मुंबई पोलिसांचा ‘बॉस’ ठरला, परमबीर सिंह मुंबईचे नवे पोलिस आयुक्त
परमबीर सिंह हे यापूर्वीही आयुक्तपदाच्या शर्यतीत होते. मात्र, तत्कालीन मुख्यमंत्री देवेंद्र फडणवीस यांनी त्यांना डावलून संजय बर्वे यांची मुंबईच्या आयुक्तपदी नेमणूक केली होती.
मुंबई : देशातील अत्यंत महत्त्वाचं आणि प्रतिष्ठेचं पद असलेल्या मुंबईच्या पोलिस आयुक्तपदी आयपीएस अधिकारी परमबीर सिंह यांची वर्णी लागली आहे. पोलिस आयुक्तपदाच्या शर्यतीत असलेल्या दहा ते बारा जणांना मागे टाकत परमबीर सिंह यांची निवड झाली आहे. ठाकरे सरकारने परिपत्रक काढून ही घोषणा केली. (Param Bir Singh Mumbai Police Commissioner)
संजय बर्वे मुंबई पोलिस आयुक्तपदावरुन निवृत्त झाल्यानंतर त्यांच्या जागी कोणाची वर्णी लागणार, याकडे गेल्या काही दिवसांपासून सर्वांचं लक्ष लागलं होतं. फेब्रुवारीच्या अखेरच्या दिवशी या सस्पेन्सवर पडदा पडला.
परमबीर सिंह हे यापूर्वीही मुंबई पोलिस आयुक्तपदाच्या शर्यतीत होते. मात्र, तत्कालीन मुख्यमंत्री देवेंद्र फडणवीस यांनी सिंह यांना डावलून संजय बर्वे यांची मुंबईच्या आयुक्तपदी नेमणूक केली होती. परमबीर सिंह यापूर्वी ठाण्याचे पोलीस आयुक्तही होते. सध्या परमबीर सिंह लाचलुचपत प्रतिबंधक विभागाचे महासंचालक आहेत.
Param Bir Singh appointed new Mumbai Police Commissioner
— Press Trust of India (@PTI_News) February 29, 2020
कोण आहेत परम बीर सिंह? • परम बीर सिंह हे 1988 बॅचचे आयपीएस अधिकारी आहेत. • त्यांनी महाराष्ट्र पोलीस विभागात अनेक पदांवर काम केलं. • लाचलुचपत प्रतिबंध विभागाचे महासंचालक पद सांभाळलं. • ते महाराष्ट्र दहशतवादविरोधी पथकाचे उपप्रमुख देखील होते. • परम बीर सिंह हे ठाण्याचे पोलीस आयुक्त होते.
मुंबई पोलीस आयुक्त संजय बर्वे आज (29 फेब्रुवारी) निवृत्त झाले. खरं तर त्यांना केवळ एक वर्षाचा कालावधी मिळाला होता. मात्र, आधी लोकसभा निवडणुका आणि नंतर विधानसभा निवडणुकांमुळे त्यांना दोनदा मुदतवाढ मिळाली. त्यांच्या चांगल्या कामामुळे त्यांना सहा महिने अधिक मिळाले.
संजय बर्वे यांच्यानंतर मुंबईचा पोलिस आयुक्त कोण होणार याची चर्चा गेल्या सहा महिन्यांपासून सुरू होती. या पदासाठी परमबीर सिंह यांच्याशिवाय राज्याच्या टेक्निकल विभागाचे प्रमुख हेमंत नगराळे, राज्य गुप्तवार्ता विभागाच्या आयुक्त रश्मी शुक्ला, पुण्याचे पोलिस आयुक्त के वेंकटेशम, सध्या केंद्रात प्रति नियुक्तीवर असलेले सदानंद दाते यासारख्या दहा-बारा अधिकाऱ्यांच्या नावाची चर्चा होती.
परमबीर सिंह यांच्या बदलीने रिक्त होणाऱ्या लाचलुचपत प्रतिबंधक विभागातील महासंचालकपदाचा अतिरिक्त कार्यभार बिपिन के. सिंग (अपर पोलिस महासंचालक, लाचलुचपत प्रतिबंधक विभाग) यांच्याकडे पुढील आदेशापर्यंत सोपवण्यात आला आहे.
Param Bir Singh Mumbai Police Commissioner
