लठ्ठपणामुळे कॅन्सरचा धोका वाढतो? शरीरातील अतिरिक्त चरबी ठरू शकते घातक, जाणून घ्या काय सांगतात तज्ज्ञ

वजन नियंत्रणात न ठेवल्यास त्याचे रूपांतर लठ्ठपणात होऊ शकते. खाण्याच्या सवयींमधील बदल, बैठी जीवनशैली, रात्री उशिरापर्यंत जागे राहणे आणि ताण यांसारखे अनेक घटक लठ्ठपणाला कारणीभूत ठरतात. लठ्ठपणा म्हणजे शरीरात अतिरिक्त चरबी जमा होणे. याचा परिणाम केवळ दैनंदिन कामांवरच होत नाही, तर आरोग्याच्या गंभीर समस्याही निर्माण होऊ शकतात. वजन वाढल्यास आहार आणि दिनचर्येत बदल करणे आवश्यक असते. मात्र, अनेकजण याकडे दुर्लक्ष करतात. चला, याबद्दल तज्ज्ञांकडून जाणून घेऊया. लठ्ठपणा आणि कर्करोग यांचा संबंध आहे का?

मेडिकल ऑन्कोलॉजी तज्ज्ञ डॉ. अमिश वोरा यांच्या मते, लठ्ठपणामुळे मधुमेह आणि उच्च रक्तदाबाचा धोका वाढतो. त्यामुळे हृदयविकारही होऊ शकतात. मात्र, लठ्ठपणाचा संबंध काही प्रकारच्या कर्करोगाशीही आहे. वजन वाढल्यामुळे शरीरात सूज, हार्मोन्सचे असंतुलन आणि चयापचय प्रक्रियेत बदल होऊ शकतात. या बदलांमुळे काही विशिष्ट प्रकारच्या कर्करोगांचा धोका वाढू शकतो.

जागतिक आरोग्य संघटनेचा अहवाल

जागतिक आरोग्य संघटनेनुसार (WHO), लठ्ठपणा हा दीर्घकालीन आजार असून, जगभरातील सुमारे १.१ अब्ज लोक यामुळे प्रभावित आहेत. लठ्ठपणाचा संबंध टाइप २ मधुमेह, हृदयविकार, यकृत आणि मूत्रपिंडाच्या आजारांसह विविध प्रकारच्या कर्करोगांशीही आहे.

कोणत्या कर्करोगांचा धोका आहे?

लठ्ठपणामुळे यकृत, मूत्रपिंड, स्वादुपिंड, स्तन, मोठे आतडे आणि गर्भाशयाच्या अंतःस्तराच्या कर्करोगाचा धोका वाढू शकतो. मात्र, लठ्ठपणा असल्याचा अर्थ कर्करोग होईलच असे नाही; केवळ त्याची शक्यता वाढते.

निरोगी खाण्याच्या सवयी अंगीकारा

लठ्ठपणा, मधुमेह, फॅटी लिव्हर आणि हृदयविकारांचा धोका कमी करण्यासाठी निरोगी जीवनशैलीचा अवलंब करा. आपल्या उंचीनुसार निरोगी वजन राखण्याचा प्रयत्न करा. आहारातून अतिरिक्त साखर, मीठ आणि अनहेल्दी फॅट कमी करा. तसेच, संपूर्ण धान्ये, फळे, सुका मेवा, हिरव्या भाज्या आणि कडधान्यांचा समावेश करा.

चांगली झोप आणि व्यायाम

डेली रुटीनमध्ये शारीरिक हालचालींचा समावेश करा. यासाठी सकाळी किंवा संध्याकाळी ३० ते ४० मिनिटे चालणे, धावणे, सायकलिंग, जॉगिंग, नृत्य, झुम्बा किंवा योगासने यांसारखे व्यायाम करा. सतत बसून काम करत असल्यास दर ३० ते ४० मिनिटांनी उठून काही मिनिटे

चाला आणि स्नायूंना हलका ताण द्या.

पुरेशी झोप घेणेही महत्त्वाचे आहे. अनियमित झोपेमुळे तणाव आणि कॉर्टिसोल या हार्मोनची पातळी वाढू शकते. यामुळे खाण्याच्या सवयींवर परिणाम होऊन वजन वाढण्याची शक्यता असते. त्यामुळे निरोगी वजन राखण्यासाठी आहार, व्यायाम आणि झोप या तिन्ही गोष्टींकडे लक्ष द्या.