Thalapathy Vijay: 52व्या वर्षीही थलपती विजय इतके फिट कसे? इडली-अंड्यांपासून बिर्याणीपर्यंत, असा आहे मुख्यमंत्र्यांचा डाएट
Thalapathy Vijay: थलपती विजय हे केवळ दाक्षिणात्य सुपरस्टारच नाही, तर आता तमिळनाडूचे मुख्यमंत्री म्हणूनही जबाबदारी सांभाळत आहेत. व्यस्त दिनक्रमातही त्यांनी फिटनेस आणि आहाराची शिस्त कायम ठेवली आहे. त्यांच्या डाएटमध्ये नेमकं काय असतं, हे जाणून घेऊया.
दाक्षिणात्य सुपरस्टार आणि तमिळनाडूचे मुख्यमंत्री जोसेफ विजय यांची ओळख केवळ अभिनय आणि राजकारणापुरती मर्यादित नाही; त्यांच्या फिटनेसचीही कायम चर्चा होत असते. वयाच्या ५२व्या वर्षीही स्वतःला फिट ठेवण्यासाठी ते आहारात विशेष शिस्त पाळतात. मात्र, त्यांचा डाएट म्हणजे आवडते पदार्थ पूर्णपणे बंद करणारा कडक आहार नाही, तर योग्य प्रमाण आणि संतुलनावर आधारित दिनचर्या आहे. त्यांच्या फिटनेस ट्रेनर नरेश कुमार यांनी एका मुलाखतीत सांगितलेल्या माहितीनुसार, नाश्त्यापासून रात्रीच्या जेवणापर्यंत त्यांच्या आहारात काही ठराविक पदार्थांचा समावेश असतो. विशेष म्हणजे इडली-अंडी, चिकन-मासे यांसोबतच मटण बिर्याणी आणि सक्कराई पोंगलसारखे आवडते पदार्थही त्यांच्या आहारात आहेत.
कडक डाएट नाही, ‘पोर्शन कंट्रोल’वर भर!
थलपती विजय कोणताही पदार्थ खाणे पूर्णपणे बंद करत नाहीत, तर खाण्याचे प्रमाण नियंत्रित ठेवतात. त्यांच्या आहारात प्रामुख्याने घरचे आणि साधे पदार्थ असतात. व्यस्त वेळापत्रक असतानाही ते शक्यतो घरचेच जेवण सोबत नेतात आणि जंक फूड टाळतात. सकाळी लवकर म्हणजे साधारण ५.३० ते ६ वाजण्याच्या दरम्यान ते उठतात. त्यांच्या आहारात प्रथिने, भाज्या, फळे आणि नियंत्रित प्रमाणातील कार्बोहायड्रेट्सचा समावेश असल्याचे सांगितले जाते. त्यामुळे फिटनेससाठी फक्त एखादा पदार्थ बंद करण्यापेक्षा संपूर्ण आहाराची शिस्त महत्त्वाची असल्याचे त्यांच्या दिनचर्येतून दिसून येते.
नाश्त्यात दोन इडल्या आणि अंडी
थलपती विजय सकाळी साधारण ९ वाजता नाश्ता करतात. त्यांच्या नाश्त्यात दोन इडल्या आणि अंडी असतात. ‘बिगिल’ चित्रपटाच्या तयारी दरम्यान त्यांच्या नाश्त्यात भाज्यांचाही समावेश करण्यात आला होता. इडलीसोबत अंडी घेतल्याने नाश्त्यात कार्बोहायड्रेट आणि प्रथिनांचा समावेश होतो.
दुपारच्या जेवणात घरगुती पदार्थ
जोसेफ विजय दुपारी साधारण १ वाजता जेवतात. त्यांच्या जेवणात घरगुती पदार्थ, भाज्या आणि फळांचा समावेश असतो. भात आणि प्रथिनयुक्त पदार्थही ते खातात, मात्र त्याचे प्रमाण नियंत्रित ठेवले जाते. दुपारच्या जेवणानंतर भूक लागल्यास सलाड किंवा कधीकधी ज्यूस घेतात.
रात्री घेतात हलका आहार
विजय रात्री साधारण ७ ते ७.३० वाजता जेवतात. रात्रीचे जेवण तुलनेने हलके ठेवतात. सूप किंवा सलाडसारख्या पदार्थांचा त्यात समावेश असतो. दिवसाच्या शेवटी जड आहार टाळण्यावर त्यांचा भर असल्याचे ट्रेनरने सांगितले.
बिर्याणीही आवडते
थलपती विजय पूर्णपणे शाकाहारी आहार घेत नाहीत. त्यांच्या डाएटमध्ये चिकन आणि मासेही असतात. विशेष म्हणजे मटण बिर्याणी हा त्यांचा आवडता पदार्थ आहे. त्यांना सक्कराई पोंगलही आवडतो. मात्र, आवडते पदार्थ खातानाही प्रमाणावर नियंत्रण ठेवले जाते.
डाएटसोबत व्यायाम
जोसेफ विजय यांच्या फिटनेस रुटीनमध्ये आहारासोबत व्यायामालाही महत्त्व आहे. चालणे, धावणे, वेट ट्रेनिंग आणि सायकलिंग यांसारख्या व्यायामांचा त्यांच्या रूटीनमध्ये समावेश असल्याचे सांगितले जाते. त्यामुळे त्यांच्या फिटनेस रुटीनमध्ये आहारासोबत नियमित शारीरिक हालचालींनाही महत्त्व दिले जाते.
