अंत्यसंस्कारातही अज्ञातांची भीती!पुलवामा हल्ल्याचा मास्टरमाइंड हमझाच्या मृत्यूची दहशत, टॉप कमांडरसाठी…
पुलवामा हल्ल्यानंतर हमझा बुरहान मुझफ्फराबादमध्ये एका खाजगी कॉलेजचा प्रिन्सिपल म्हणून ओळख लपवून राहत होता. कॉलेज कॅम्पसबाहेर पडताच अज्ञात बंदूकधाऱ्यांनी त्याच्यावर अगदी जवळून गोळ्या झाडून त्याला ठार केले. त्यानंतर त्याच्या अंत्यसंस्काराच्यावेळी देखील टॉप कमांडरवर कडक सुरक्षेत आल्याचे पाहायला मिळाले.
२०१९ मधील पुलवामा दहशतवादी हल्ल्याचा मुख्य सूत्रधार आणि अल-बद्रचा कमांडर हमझा बुरहान (उर्फ अर्जुमंद गुलझार डार / कोडनेम ‘डॉक्टर’) याच्या अंत्यसंस्काराला पाकिस्तानात अनेक कुख्यात दहशतवादी आणि टॉप कमांडर उपस्थित होते. पाकिस्तानात आणि पाकव्याप्त काश्मीरमध्ये गेल्या काही काळापासून अज्ञात बंदूकधाऱ्यांकडून दहशतवाद्यांच्या होणाऱ्या लक्ष्यित हत्येच्या भीतीपोटी या अंत्यसंस्कारादरम्यान कडक सुरक्षा व्यवस्था तैनात करण्यात आली होती.
पाकव्याप्त काश्मीरच्या मुझफ्फराबादमध्ये अज्ञात हल्लेखोरांनी हमझा बुरहानची गोळ्या झाडून हत्या केली होती. त्यानंतर इस्लामाबाद येथे पार पडलेल्या त्याच्या अंत्यसंस्काराला हिजबल मुजाहिद्दीनचा प्रमुख सय्यद सलाहुद्दीन आणि अल-बद्र या दहशतवादी संघटनेचा सर्वेसर्वा बख्त झमीन खान हे प्रामुख्याने उपस्थित होते. स्थानिक लोकांनी सोशल मीडियावर शेअर केलेल्या व्हिज्युअल्सनुसार, पाकिस्तानच्या गुप्तचर संस्था आयएसआयचे काही अधिकारी देखील या अंत्यसंस्काराच्या गर्दीत उपस्थित असल्याचे दिसून आले. सोशल मीडियावर समोर आलेल्या व्हिज्युअल्समध्ये अल-बद्रचा प्रमुख बख्त झमीन खान याच्याभोवती एके-४७ रायफल्स आणि अत्याधुनिक शस्त्रास्त्रांनी सज्ज असलेले दहशतवादी सुरक्षेसाठी तैनात करण्यात आले होते. पाकिस्तानातील अज्ञात हल्लेखोरांच्या भीतीमुळे ही अभूतपूर्व सुरक्षा पुरवण्यात आली होती.
कित्येक वर्ष लपवली ओळख
फेब्रुवारी २०१९ मध्ये जम्मू-काश्मीरच्या पुलवामा येथे झालेल्या आत्मघाती दहशतवादी हल्ल्यात सीआरपीएफचे ४० हून अधिक जवान शहीद झाले होते, ज्याच्या मुख्य सूत्रधारांपैकी हमझा बुरहान हा एक होता. तो मूळचा जम्मू-काश्मीरच्या पुलवामा जिल्ह्यातील रत्नीपोरा येथील रहिवासी होता. २०१८ मध्ये तो अधिकृत कागदपत्रांच्या आधारे उच्च शिक्षणासाठी (एमबीबीएसच्या नावाखाली) पाकिस्तानात गेला आणि तेथे अल-बद्र दहशतवादी संघटनेत सामील झाला. जम्मू-काश्मीरमधील अनेक दहशतवादी कारवाया, तरुणांची भरती आणि टेरर फंडिंगमधील सहभागामुळे भारताच्या गृह मंत्रालयाने एप्रिल २०२२ मध्ये त्याला अधिकृतपणे ‘दशतवादी’ घोषित केले होते. पुलवामा हल्ल्यानंतर तो मुझफ्फराबादमध्ये एका खाजगी कॉलेजचा प्रिन्सिपल म्हणून ओळख लपवून राहत होता, जिथे कॉलेज कॅम्पसबाहेर पडताच अज्ञात बंदूकधाऱ्यांनी त्याच्यावर अगदी जवळून गोळ्या झाडून त्याला ठार केले.
कुटुंबाला प्रचंड मानसिक त्रास
दरम्यान, हमझा बुरहानच्या मृत्यूची बातमी आल्यानंतर काश्मीरमधील त्याच्या कुटुंबीयांनी एक पत्रक जारी करून त्याच्याशी कोणताही संबंध नसल्याचे स्पष्ट केले आहे. २०१८ मध्ये तो पाकिस्तानात गेल्यानंतर आमचा त्याच्याशी कोणताही संपर्क नव्हता आणि त्याच्या देशद्रोही तसेच दहशतवादी कृत्यांमुळे संपूर्ण कुटुंबाला प्रचंड मानसिक आणि सामाजिक त्रास सहन करावा लागला, असे त्याच्या वडिलांनी प्रसारमाध्यमांना सांगितले.
