अमेरिकेचे 3 एफ-15 फायटर जेट इराणने नाही पाडले तर मग कोणी पाडले? युद्धात मोठा ट्विस्ट
अमेरिका इस्रायल आणि इराणमध्ये भीषण युद्ध सुरू आहे. आज युद्धाचा तिसरा दिवस आहे. युद्धाच्या दुसऱ्या दिवशी अमेरिकेचे तीन फायटर जेट्स पाडण्यात आले होते, यामध्ये आता मोठं ट्विस्ट आलं आहे.
कुवेतमध्ये अमेरिकेचे तीन फायटर जेट पाडल्याचा दावा इराणकडून करण्यात आला होता, दरम्यान यावर आता अमेरिकेची पहिली अधिकृत प्रतिक्रिया समोर आली आहे. अमेरिकेचे फायटर जेट हे इराणने नाही तर कुवेतच्या एअर डिफेन्स सिस्टमने चुकून पाडले असं अमेरिकेनं म्हटलं आहे. दरम्यान यापूर्वी इराणकडून मोठा दावा करण्यात आला होता, कुवेतमध्ये अमेरिकेचे तीन फायटर जेट पाडल्याचा दावा इराणने केला होता. तर अमेरिकेचे फायटर जेट पाडल्याच्या वृत्ताला कुवेतने देखील दुजोरा दिला होता.
कुवेतने आपल्या दाव्यामध्ये काय म्हटलं होतं?
अमेरिकेचे फायटर जेट पाडल्यानंतर कुवेतच्या संरक्षण मंत्रालयाकडून एक अधिकृत स्टेटमेंट जारी करण्यात आलं होतं. ज्यामध्ये कुवेतने म्हटलं होतं की युद्धाच्या दुसऱ्या दिवशी अमेरिकेचे तीन फायटर जेट पाडण्यात आले आहेत. या सर्व विमानातील पायलट सुरक्षित असून, त्यांना उपचारासाठी रुग्णालयात दाखल करण्यात आलं आहे. त्यानंतर कुवेतमधून एक व्हिडीओ देखील समोर आला होता, ज्यामध्ये अमेरिकेचे फायटर जेट पाडण्यात आल्यानंतर त्यामधील पायलटला रुग्णालयात नेत असताना दिसत आहे. आम्ही अमेरिकन अधिकाऱ्यांच्या संपर्कात आहोत आणि आम्ही पुढील योजना बनवत आहेत, असंही कुवेतने आपल्या स्टेटमेंटमध्ये म्हटलं आहे.
दरम्यान कुवेतमध्ये अमेरिकन सैन्याची तळं आहेत, त्यामुळे आता इराणने कुवेतला देखील लक्ष्य केलं आहे. युद्धाच्या दुसऱ्या दिवशी इराणने कुवेतवर जोरदार हल्ला केला, कुवेतमध्ये असलेल्या अमेरिकेच्या दुतावासाला इराणकडून टार्गेट करण्यात आलं. त्यानंतर देखील इराणने कुवेतवर अनेक मिसाईल हल्ले केले. याचदरम्यान अमेरिकेचे तीन फायटर जेट एफ-15 पाडण्यात आले होते. ते फायटर जेट आपण पाडल्याचा दावा इराणने केला होता, मात्र त्यानंतर आता अमेरिकेकडून पहिली प्रतिक्रिया समोर आली असून, कुवेतच्या एअर डिफेन्स सिस्टमने चुकून विमान पाडल्याचं अमेरिकेनं म्हटलं आहे. त्यामुळे आता हे फायटर जेट इराणने पाडले नसल्याचं स्पष्ट झालं आहे. दरम्यान इराणकडून देखील अमेरिका आणि इस्रायलला जोरदार प्रत्युत्तर देण्यात येत आहे.
