काऊंटडाऊन सुरू… अवघ्या काही तासात जगातील एका महान सभ्यतेचा होणार अंत… अख्खा देशच होणार बेचिराख; ट्रम्प यांची पुन्हा धमकी

इराण आणि अमेरिका यांच्यात भयंकर युद्ध सुरू आहे. अशातच आता अमेरिकेचे राष्ट्राध्यक्ष डोनाल्ड ट्रंप यांनी इराणबाबत पुन्हा एकदा मोठं विधान केलं आहे. इराणला गंभीर इशारा देताना त्यांनी म्हटले की, ‘परिस्थिती बदलली नाही तर आज रात्रीच एका प्राचीन सभ्यतेचा कायमचा अंत होऊ शकतो. आज रात्री एक संपूर्ण सभ्यता नष्ट होईल, जी पुन्हा कधीही परत आणता येणार नाही. मला असे व्हावे असे वाटत नाही, पण कदाचित तसेच होईल. कदाचित काही क्रांतिकारी आणि अद्भुत घडू शकते, कोण जाणे काय होईल?’

इराणला गंभीर इशारा

अमेरिका आणि इराण यांच्यातील तणाव शिगेला पोहोचला असताना ट्रंप यांनी हे विधान केले आहे. ट्रम्प यांनी होर्मुजची सामुद्रधुनी पुन्हा उघडण्यासाठी किंवा करार करण्यासाठी मंगळवारी संध्याकाळी 8 वाजेपर्यंतची मुदत दिली आहे. ट्रंप यांनी यापूर्वीही इराणला अश्मयुगात परत पाठवण्याची धमकी दिली होती, ज्याचा इराणने तीव्र निषेध केला होता. इराणने हा त्यांच्या 7000–8000 वर्षे जुन्या सभ्यतेवर हल्ला असल्याचे सांगत अमेरिकेलाही गंभीर इशारा दिला आहे.

ट्रम्प यांची ट्रूथ सोशलवर पोस्ट

डोनाल्ड ट्रम्प यांनी ट्रूथ सोशलवर पोस्ट करत लिहिले की, ‘एक संपूर्ण सभ्यता आज रात्री नष्ट होईल, जी पुन्हा कधीही परत आणता येणार नाही. मला असे व्हावे असे वाटत नाही, पण कदाचित तसे होईल. आज रात्री आपल्याला कळेल, जे जगाच्या दीर्घ आणि गुंतागुंतीच्या इतिहासातील सर्वात महत्त्वाच्या क्षणांपैकी एक असेल.’

रात्रीत काहीतरी भयंकर घडण्याची शक्यता

समोर आलेल्या माहितीनुसार ट्रम्प यांनी इराणला दिलेल्या धमकीची मुदत आज रात्री 8 वाजता संपणार आहे. याआधी ट्रम्प यांनी म्हटले होते की, जर त्या वेळेपर्यंत होर्मुज सामुद्रधुनी उघडली नाही, तर इराणला मोठ्या प्रमाणावर बॉम्बहल्ल्यांचा सामना करावा लागू शकतो. जर इराणने वेळेत समुद्री वाहतुकीसाठी होर्मुज उघडला नाही किंवा करार केला नाही, तर एका रात्रीत त्यांचा नाश करू शकतात. त्यामुळे आता आज रात्रीत इराणमध्ये काहीतरी भयंकर घडण्याची शक्यता नाकारता येत नाही.