RO फिल्टर साफ करण्यासाठी आता टेक्नीशियनची गरज नाही, घरच्या घरी ‘या’ पद्धतीने करा स्वच्छ

स्नेहल मेंगळ: आजकाल बहुतेक घरांमध्ये पाणी शुद्ध करण्यासाठी आरओ वॉटर प्युरिफायर बसवलेले असते. आरओ बसवल्यानंतर, बहुतेक लोकांना वाटते की आता पाणी स्वच्छ करण्याची संपूर्ण जबाबदारी फक्त त्या मशीनचीच आहे. ते वेळेवर फिल्टर बदलतात, त्याची सर्व्हिसिंग करून घेतात आणि झाले. पण तुम्हाला माहित आहे का की आरओमधील पाण्याच्या टाकीच्या स्वच्छतेकडे लक्ष देणे तितकेच महत्त्वाचे आहे? जर ही टाकी बराच काळ स्वच्छ केली नाही, तर त्यात साचलेली घाण आणि तेलकटपणा तुमच्या शुद्ध केलेल्या पाण्याला दूषित करू शकतो.

विशेषतः पावसाळ्यात हवेतला दमटपणा आणि टाकीत बराच वेळ साचून राहिलेले पाणी यामुळे RO च्या टाकीत घाण किंवा चिकटपणा साचण्याची शक्यता वाढते. अशावेळी टाकी स्वच्छ करण्यासाठी अनेकजण टेक्नीशियनला बोलावतात आणि त्यासाठी अतिरिक्त पैसे खर्च करतात. पण प्रत्येक वेळी टेक्नीशियनला बोलावण्याची गरज असेलच असे नाही. तुमच्या RO मॉडेलमध्ये टाकी सहज आणि सुरक्षितपणे काढता येत असेल तर तिची प्राथमिक स्वच्छता घरच्या घरी करता येऊ शकते. आजच्या लेखात आपण RO ची पाण्याची टाकी स्वच्छ करण्याची सोपी पद्धत सांगणार आहोत, ज्यामुळे वेळ आणि अनावश्यक खर्च दोन्ही वाचण्यास मदत होईल.

आरओ पाण्याची टाकी अस्वच्छ असल्याची ही चिन्हे ओळखा

RO ची टाकी अस्वच्छ झाली आहे की नाही हे नेहमी डोळ्यांना दिसेलच असे नाही. मात्र पाण्याची चव किंवा वास बदलला असेल तर त्याकडे दुर्लक्ष करू नका. कारण हे टाकी अस्वच्छ असल्याचे चिन्हं आहेत.

तुम्ही काही दिवसांसाठी घराबाहेर गेला असाल आणि RO च्या टाकीत पाणी साचून राहिले असेल, तर घरी परतल्यानंतर टाकीची स्वच्छता करणे चांगले. तसेच RO सर्व्हिसिंगच्या वेळी फिल्टर बदलताना टाकीचीही स्वच्छता करून घेणे.

साधारणपणे 1 ते 2 महिन्यांच्या अंतराने टाकीची स्वच्छता करणे योग्य आहे. मात्र पाण्याची चव किंवा वास बदलला, टाकीत घाण दिसली किंवा RO बराच काळ वापरला नसेल, तर वेळेची वाट पाहू नका. टाकीची स्वच्छता आणि RO ची सुरक्षितता तपासणे महत्त्वाचे आहे.

पाण्याची टाकी स्वच्छ करण्यापूर्वी या गोष्टी नक्की करा

RO ची टाकी साफ करण्यापूर्वी सुरक्षिततेला सर्वात आधी प्राधान्य द्या. टाकी उघडण्यापूर्वी RO चा प्लग काढा आणि पाण्याचा पुरवठा बंद करा. त्यानंतर टाकीत साचलेले उरलेले पाणी पूर्णपणे बाहेर काढा.

पाणी तुलनेने ताजे असेल आणि त्याची चव किंवा वास बदललेला नसेल, तर ते झाडांना पाणी देण्यासाठी किंवा घरातील साफसफाईसाठी वापरू शकता.

टाकी स्वच्छ करण्याची सोपी पद्धत

तुमच्या RO ची टाकी सहज बाहेर काढता येत असेल, तर ती हळुवारपणे काढा. मात्र, टाकी मशीनमध्ये घट्ट बसवलेली असेल तर ती जबरदस्तीने काढण्याचा प्रयत्न करू नका. तुमच्या RO मॉडेलनुसार जेवढा भाग सुरक्षितपणे उघडता येतो, तेवढाच उघडा. टाकी काढताना पाईप, वायर किंवा कोणत्याही जोडणीला ओढ किंवा ताण येणार नाही, याची विशेष काळजी घ्या.

टाकी साफ करण्यासाठी डिशवॉशिंग लिक्विड, डिटर्जंट, साबण किंवा तीव्र रसायन असलेले क्लीनर वापरू नका. याऐवजी RO उत्पादकाच्या सूचनांनुसार योग्य क्लीनिंग पद्धत वापरणे सुरक्षित ठरते. घरगुती उपाय वापरण्यापूर्वी तुमच्या RO मॉडेलच्या मॅन्युअलमध्ये त्याला परवानगी आहे का, हे तपासा.

टाकी स्वच्छ केल्यानंतर ती स्वच्छ पाण्याने 2-3 वेळा व्यवस्थित धुवा, जेणेकरून कोणताही क्लीनिंग पदार्थ आत राहणार नाही. त्यानंतर स्वच्छ कापडाने टाकी कोरडी करा.

ही चूक अजिबात करू नका!

टाकीतील घाण काढण्यासाठी स्टीलचा स्क्रबर, धारदार वस्तू किंवा खडबडीत कापड वापरू नका. यामुळे टाकीला ओरखडे पडू शकतात. तसेच RO सहज उघडत नसेल किंवा टाकी काढण्यासाठी पाईप-वायरची जोडणी करावी लागत असेल, तर जबरदस्ती करू नका. अशावेळी टेक्नीशियनची मदत घेणेच योग्य आहे.