बाबो! फक्त इतके रुपये होतं ताज हॉटेलमधील रुमचं भाडं; 1966चं बिल चर्चेत, आजचा रेट काय?

मुंबईतील गेटवे ऑफ इंडियासमोर दिमाखात उभे असलेले ताजमहाल पॅलेस हे देशातील प्रसिद्ध आणि ऐतिहासिक लक्झरी हॉटेलपैकी एक आहे. १९०३ मध्ये स्थापन झालेले हे हॉटेल आज आपल्या ऐतिहासिक वास्तुरचना, आलिशान सुविधा आणि ताज हॉस्पिटॅलिटीसाठी ओळखले जाते. मात्र, तब्बल सहा दशकांपूर्वी याच हॉटेलमध्ये एका रात्रीच्या मुक्कामासाठी किती पैसे मोजावे लागत होते, याचा अंदाज एका जुन्या बिलावरून येतो. एका Reddit युजरने १० जानेवारी १९६६ रोजीचे ताज हॉटेलचे बिलाचा फोटो शेअर केला असून, हे बिल त्याच्या मित्राच्या कुटुंबाच्या आर्काइव्हमधील असल्याचे त्याने सांगितले आहे. या बिलानुसार, त्या वेळी खोलीचे मूळ भाडे अवघे १०५ रुपये होते. इतर शुल्क जोडल्यानंतर अंतिम बिल १२७ रुपये ७० पैसे झाले होते. सोशल मीडियावर हे जुने बिल व्हायरल झाल्यानंतर त्यावेळच्या हॉटेलच्या दरांची आणि आजच्या किमतींची तुलना केली जात आहे.

आज ताजमध्ये एका रात्रीसाठी किती खर्च?

१९६६ मधील १०५ रुपये पाहता आजची किंमत किती असेल, असा प्रश्न साहजिकच पडतो. उपलब्ध अलीकडील वृत्तानुसार, ताजमहाल पॅलेसमध्ये एका रात्रीच्या मुक्कामाचा खर्च सध्या ३४ हजार रुपयांपेक्षा जास्त जाऊ शकतो. मात्र, प्रत्यक्ष दर खोलीचा प्रकार, तारीख, उपलब्धता आणि लागू करांनुसार बदलतात. हॉटेलच्या अधिकृत संकेतस्थळावरही वेगवेगळ्या खोल्या आणि सुइट्ससाठी स्वतंत्र दर व सुविधा दिल्या आहेत.

युजर्सच्या कमेंट्सचीही चर्चा

१९६६ मधील ताज हॉटेलचे बिल पाहिल्यानंतर रेडीट युजर्सनी त्यावर वेगवेगळ्या प्रतिक्रिया दिल्या. एका युजरने त्या काळातील महागाईचा संदर्भ देत १९६६ मधील १०० रुपये आजच्या काळात सुमारे ८ हजार रुपयांच्या आसपास असतील, अशी तुलना केली. तर दुसऱ्या युजरने हे बिल नेमके कुठून मिळाले, अशी उत्सुकता व्यक्त केली. त्यावर बिल शेअर करणाऱ्या युजरने हे त्याच्या मित्राच्या कुटुंबाच्या आर्काइव्हमधील असल्याचे सांगितले. काही युजर्सनी या बिलावरून त्या काळातील ताजची लक्झरी आणि आजच्या हॉटेलच्या किमती यांचीही तुलना केली.

ताज हॉटेल इतके खास का?

ताजमहाल पॅलेस हे केवळ राहण्यासाठीचे हॉटेल नसून मुंबईच्या इतिहासाशी जोडलेली वास्तू आहे. गेटवे ऑफ इंडियाकडे समुद्राचे दृश्य, ऐतिहासिक वास्तुरचना, कलाकृती आणि आलिशान सुइट्स यामुळे त्याला विशेष ओळख मिळाली आहे. हॉटेलच्या अधिकृत माहितीनुसार, काही सुइट्समध्ये मूळ कलाकृती आणि ऐतिहासिक वस्तूंचा संग्रहही आहे. १९६६ मधील १०५ रुपयांच्या रूम चार्जपासून आजच्या हजारो रुपयांच्या दरापर्यंतचा प्रवास पाहता, हे जुने बिल केवळ एक पावती न राहता बदलत्या काळाची आठवण ठरले आहे.