फ्रिजमध्ये चुकूनही ठेवू नका ‘या’ भाज्या, जाणून घ्या योग्य साठवणुकीची पद्धत

अनेक महिलांना घरी भाज्या आणल्याबरोबर फ्रिजमध्ये ठेवायची सवय असते. कारण थंड जागी ठेवल्याने भाज्या जास्त काळ टिकतात असे त्यांना वाटते. पण नेहमीच असे होत नाही. काही भाज्या फ्रिजमध्ये ठेवल्यानंतर त्यांची चव आणि पोत तसाच राहत नाही. अनेकदा आपण चांगल्या भाज्या विकत घेतो, पण चुकीच्या साठवणुकीमुळे त्या लवकर खराब होतात. त्यामुळे, केवळ भाज्या विकत घेणे नव्हे तर त्या योग्य जागी साठवणे देखील महत्त्वाचे आहे. जर तुम्ही सुद्धा घरातील जवळपास प्रत्येक भाजी फ्रिजमध्ये ठेवत असाल, तर एकदा तुमच्या या सवयीकडे लक्ष द्या. काही भाज्या अशा आहेत ज्या फ्रिजच्या बाहेर ठेवणे चांगले असते. चला तर माग जाणून घ्या अशा कोणत्या भाज्या आहेत, ज्या चुकूनही फ्रीजमध्ये ठेवू नये.

बटाटे

बटाटे फ्रिजमध्ये ठेवणे टाळा. अति थंड तापमानामुळे बटाट्यांमधील काही स्टार्चचे साखरेत रूपांतर होऊ शकते, ज्यामुळे शिजवल्यावर त्यांची चव आणि रंग बदलू शकतो. बटाटे नेहमी कोरड्या, अंधाऱ्या आणि हवेशीर जागी ठेवा. त्यांना हवाबंद प्लास्टिकच्या पिशवीत ठेवण्याऐवजी, हवेशीर टोपली किंवा पिशवीत ठेवा.

कांदा

कांदे फ्रिजमध्ये ठेवण्याची गरज नसते. फ्रिजमधील आर्द्रतेमुळे कांदे लवकर मऊ होऊ शकतात आणि त्यांना बुरशी लागण्याचा देखील धोका वाढतो. ते कोरड्या, हवेशीर जागेत ठेवावे. कांदे बटाट्यांजवळ ठेवू नका याची काळजी घ्या. कारण कांद्यातून बाहेर पडणारा ओलावा आणि वायूमुळे बटाटे लवकर खराब होऊ शकतात.

लसूण

लसूण फ्रिजमध्ये ठेवण्याऐवजी कोरड्या, हवेशीर जागेत साठवणे उत्तम असते. फ्रिजमधील आर्द्रतेमुळे लसणाच्या पाकळ्या लवकर मऊ पडून खराब होऊ शकतात. लसूण थेट सूर्यप्रकाशापासून दूर आणि भरपूर हवा खेळती राहील अशा ठिकाणी साठवा.

टोमॅटो

टोमॅटो नेहमीच फ्रिजमध्ये ठेवण्याची गरज नसते. थंड तापमानामुळे त्यांच्या चवीवर आणि पोतावर परिणाम होऊ शकतो. जर टोमॅटो कच्चे असतील, तर ते रूम टेम्परेचरवर ठेवा. टोमॅटो पूर्णपणे पिकल्यानंतर जर तुम्हाला ते आणखी काही दिवस ठेवायचे असतील, तर तुम्ही फ्रिजचा वापर करू शकता.

कच्ची केळी

कच्ची केळी फ्रिजमध्ये ठेवल्याने त्यांची साल लवकर काळपट होऊ शकते आणि ती व्यवस्थित पिकत नाहीत. त्यामुळे ती खोलीच्या तापमानावर साठवणे उत्तम असते. त्यांना थेट सूर्यप्रकाशापासून दूर ठेवा. एकाच वेळी भरपूर केळी खरेदी करण्याऐवजी तुम्हाला आवश्यक असतील तेवढीच खरेदी करा.

भाज्या साठवताना लक्षात ठेवा या गोष्टी

भाज्या फ्रिजमध्ये किंवा बाहेर कुठे साठवायचे हे ठरवणे आवश्यक नाही. तर भाज्या साठवताना काही गोष्टींची काळजी घेतली पाहिजे. भाज्या साठवण्याची जागा स्वच्छ आणि कोरडी असावी. ओल्या भाज्या जास्त काळ बंद डब्यात ठेवल्यास त्या लवकर खराब होऊ शकतात. भाज्या खरेदी केल्यानंतर आधी त्या काळजीपूर्वक निवडा. जर एखादी भाजी आधीच मऊ होत असेल किंवा खराब होत असेल, तर ती इतर भाज्यांसोबत ठेवू नका. सर्वात महत्त्वाचे म्हणजे, गरजेपेक्षा जास्त भाज्या एकाच वेळी विकत घेण्याऐवजी, काही दिवसांत वापरता येतील तितक्याच भाज्या विकत घ्या. यामुळे अन्नाची बचत होईल आणि भाज्या ताज्या राहतील.