Navratri Recipe: नवरात्री उपवासात नेहमीची साबुदाणा खिचडी नाही, खा साबुदाण्याचा चीला, ट्राय करा ही सोपी रेसिपी

नवरात्रीच्या उपवासात साबुदाणा खिचडी किंवा वडा खाण्याचा तुम्हाला सुद्धा कंटाळा येतो? मग यंदा उपवासासाठी काहीतरी हटके आणि चविष्ट बनवून पाहा. नवरात्रीच्या नऊ दिवसांत उपवास करणाऱ्यांसाठी साबुदाणा चीला हा एक उत्तम पर्याय ठरू शकतो. बाहेरून कुरकुरीत आणि चवीला स्वादिष्ट असलेला हा पदार्थ सकाळच्या नाश्त्यासाठी किंवा संध्याकाळच्या स्नॅक्स टाईमसाठी झटपट तयार करता येतो. विशेष म्हणजे घरी सहज उपलब्ध असलेल्या साहित्यातून साबुदाणा चीला बनवता येतो. दही किंवा शेंगदाण्याच्या चटणीसोबत हा चीला खाल्ल्यास त्याची चव आणखी वाढते. त्यामुळे यंदाच्या नवरात्रीत नेहमीच्या उपवासाच्या पदार्थांऐवजी ही सोपी रेसिपी नक्की ट्राय करा. चला तर मग जाणून घेऊया साबुदाणा चीला बनवण्याची रेसिपी.

साबुदाणा चीला बनवण्यासाठी तुम्हाला आवश्यक आहे.

– अर्धा कप साबुदाणा

– उकडलेले बटाटे

– अर्धा कप भाजलेले शेंगदाणे

– बारीक चिरलेली हिरवी मिरची

– बारीक चिरलेली कोथिंबीर

– सैंधव मीठ

– काळी मिरी पावडर

– अर्धा चमचा जिरे

– तूप

साबुदाणा चीला बनवण्याची पद्धत

उपवासाला खास चीला बनवण्यासाठी १/२ कप साबुदाणा आदल्या रात्री भिजत ठेवा. साबुदाणा साधारण ४-५ तास भिजवल्यास तो नीट फुलतो. नंतर प्रथम बटाटे उकळून घ्या. बटाटे उकळत असताना काही शेंगदाणे भाजून घ्या आणि नंतर बारीक करून घ्या. बटाटे उकळले की त्याचे साल काढून ते चांगले मॅश करा. आता साबुदाण्याचे पाणी काढून एका भांड्यात ठेवा. आता हिरवी मिरची, कोथिंबीर, भाजलेले शेंगदाणे, काळी मिरी पावडर, मीठ, जिरे घालून एकत्र करा. त्यात बटाटे घाला आणि मॅश करा. सर्व नीट मिक्स करा. आता प्लॅस्टिक किंवा बटर पेपर घ्या. त्याच्या अर्ध्या भागावर तूप लावा आणि त्यावर साबुदाण्याचे मिश्रण ठेवा. आता दुसऱ्या भागावर सुद्धा तूप लावा आणि झाकून ठेवल्यानंतर काहीतरी जड वस्तू ठेवून सपाट करा. तव्यावर थोडे तूप घाला आणि गरम झाल्यावर तव्यावर चीला आरामात घाला. आता दोन्ही बाजूंनी चांगले शिजवा. तुमचा उपवासाचा साबुदाणा चीला तयार आहे. तुम्ही हे दही किंवा चटणीसोबत सर्व्ह करू शकता.