Diwali Shopping : दिवाळीची खरेदी करायची आहे, पण बजेट कमी आहे? मुंबईतील हे मार्केट ठरतील बेस्ट
Cheap and Budget Friendly Shopping: दिवाळीच्या निमित्ताने तुम्हाला घराची सजावट, भांडी, कपडे इत्यादी खरेदी करायची असेल तर मुंबईतील या मार्केटमध्ये जा. जिथे तुम्ही स्वस्त आणि बजेटमध्ये सहज खरेदी करू शकाल.
दिवाळी म्हटली की घराची साफसफाई, आकर्षक सजावट, रंगीबेरंगी दिवे, आकाश कंदील आणि दारात सुंदर रांगोळी हे सगळे आलेच! सणाच्या दिवसांत घर सुंदर दिसावे, यासाठी प्रत्येक जण काही ना काही नवीन वस्तू खरेदी करतो. मात्र, घराची सजावट करताना अनेकदा बजेट वाढते आणि आवडत्या वस्तू खरेदी करताना खर्चाचा विचार करावा लागतो. पण काळजी करू नका, मुंबईमध्ये अशी काही प्रसिद्ध मार्केट आहेत, जिथे कमी किमतीत घर सजावटीच्या आकर्षक वस्तूंपासून कपडे, दिवे, तोरण आणि भेटवस्तूंपर्यंत अनेक पर्याय मिळू शकतात. त्यामुळे यंदाच्या दिवाळीत बजेटमध्ये घराला सुंदर आणि फेस्टिव्ह लूक देता येईल. चला जाणून घेऊया मुंबईतील अशा मार्केटबद्दल जिथे बजेटमध्ये करता येईल दिवाळीची भरपूर खरेदी.
क्रॉफर्ड मार्केट
दिवाळीच्या खरेदीसाठी मुंबईतील क्रॉफर्ड मार्केट हा लोकप्रिय पर्याय आहे. येथे कपडे, ज्वेलरी, घराच्या सजावटीच्या वस्तू, ड्रायफ्रूट्स आणि मिठाईचे गिफ्ट बॉक्स असे अनेक पर्याय मिळतात. वेगवेगळ्या किमतींतील वस्तूंमधून बजेटनुसार खरेदी करता येते. सणासाठी भेटवस्तू घ्यायच्या असतील, तर येथे विविध प्रकारचे पर्याय पाहता येतील.
लोहार चाळ
दिवाळीसाठी घरात आकर्षक रोषणाई करायची असेल, तर दक्षिण मुंबईतील लोहार चाळला भेट देऊ शकता. येथे विविध प्रकारचे दिवे, लाइटिंगच्या माळा आणि इलेक्ट्रिकल वस्तू मिळतात. घराच्या प्रवेशद्वारापासून ते बाल्कनीपर्यंत सजावट करण्यासाठी आवश्यक रोषणाईचे साहित्य येथे शोधता येईल. खरेदी करताना वेगवेगळ्या दुकानांतील किमतींची तुलना करायला विसरू नका.
इरला मार्केट
विलेपार्ले येथील इरला मार्केटमध्ये दिवाळीच्या खरेदीसाठी विविध पर्याय मिळतात. येथे कपडे, दिवे, आकाश कंदील आणि सजावटीच्या वस्तू खरेदी करता येतात. घराला सणासुदीचा लूक देण्यासाठी आवश्यक वस्तूंचा शोध येथे घेता येईल. पश्चिम उपनगरात राहणाऱ्यांसाठी हे मार्केट खरेदीचा सोयीचा पर्याय ठरू शकते.
भुलेश्वर मार्केट
दिवाळीच्या सजावटीसाठी मातीचे दिवे, रांगोळीचे रंग, तोरण आणि पूजेचे साहित्य खरेदी करायचे असेल, तर भुलेश्वर मार्केटला भेट देऊ शकता. येथे कपडे आणि इतर सणासुदीच्या वस्तूंचेही पर्याय मिळतात. दिवाळीच्या पूजेसाठी आणि घराच्या प्रवेशद्वाराची सजावट करण्यासाठी लागणाऱ्या वस्तू एकाच परिसरात शोधता येतील.
हिंदमाता मार्केट
दादरमधील हिंदमाता मार्केट पारंपरिक कपड्यांच्या खरेदीसाठी प्रसिद्ध आहे. येथे साड्या, नऊवारी साड्या, ड्रेस मटेरियल आणि ब्लाउजसाठी कापडाचे विविध पर्याय मिळतात. दिवाळी आणि पाडव्यासाठी पारंपरिक कपडे खरेदी करायचे असतील, तर या बाजारपेठेला भेट देऊ शकता. वेगवेगळ्या डिझाइनमधील कपडे पाहून आपल्या आवडीनुसार खरेदी करण्याची संधी येथे मिळते.
