परतवाडा लैंगिक शोषण प्रकरण, आरोपी अयानचे संतापजनक कृत्य, जन्मदात्या आईसोबत…
परतवाडा येथील लैंगिक शोषण प्रकरणातील मुख्य आरोपी अयान अहमदने चैनीसाठी आईचे दागिने चोरून विकल्याचे उघड झाले आहे. आज अचलपूर न्यायालयात आरोपींची कोठडी वाढवून मिळवण्यासाठी पोलीस प्रयत्न करणार आहेत.
अमरावती जिल्ह्यातील परतवाडा या ठिकाणी तरुणींच्या लैंगिक शोषणाने आणि अश्लील व्हिडीओ प्रकरणाने संपूर्ण महाराष्ट्र हादरला आहे. या प्रकरणातील मुख्य सूत्रधार अयान अहमद याच्या वैयक्तिक आयुष्यातील काळी बाजू आता पोलीस तपासात उघड होताना दिसत आहे. केवळ गुन्हेगारी प्रवृत्तीच नव्हे, तर आपल्या विकृत गरजा पूर्ण करण्यासाठी त्याने स्वतःच्या कुटुंबालाही सोडले नसल्याची धक्कादायक माहिती समोर आली आहे.
मिळालेल्या माहितीनुसार, अयान अहमद याला सोशल मीडियावर प्रसिद्धी मिळवण्याचे प्रचंड वेड होते. तो महागडे स्मार्टफोन वापरणे, आलिशान हॉटेलमध्ये पार्ट्या करणे आणि मुलींवर हवा तसा पैसे खर्च करायचा. त्याला या सर्व गोष्टींचा छंद होता. काही दिवसांपूर्वी त्याचा एक इन्स्टाग्रामवर व्हिडीओ समोर आला होता. या व्हिडीओत त्याच्याकडे भरपूर रोख असल्याचे दिसत आहे. आता याचे मोठे गुपित समोर आले आहे.
इन्स्टाग्राम रिल्समध्ये जो नोटांचा बंडल दाखवून तो श्रीमंतीचा आव आणत असे, तो पैसा त्याने घामातून नव्हे तर चोरीतून मिळवला होता. त्याने आपल्याच आईचे सोन्याचे मंगळसूत्र आणि एक हार गुपचूप चोरून विकला होता. यातून मिळालेल्या पैशांतून तो आपली चैनीची हौस भागवत होता. त्याच्या या जीवनशैलीमुळे अयानवर मोठ्या प्रमाणावर कर्ज झाले होते. हे कर्ज फेडण्यासाठी आणि आपली महागडी स्वप्ने पूर्ण करण्यासाठी त्याने गुन्हेगारीचा मार्ग निवडला. तरुणींना जाळ्यात ओढणे, त्यांचे शोषण करणे आणि त्यानंतर अश्लील व्हिडीओच्या माध्यमातून त्यांना ब्लॅकमेल करणे, असा त्याचा क्रूर प्लॅन होता.
कोठडीत वाढ करण्याची मागणी
दरम्यान याप्रकरणातील मुख्य आरोपी अयान अहमद आणि त्याचा साथीदार हुजेर खान यांची सात दिवसांची पोलीस कोठडी आज संपत आहे. पोलीस आज दुपारी त्यांना अचलपूर न्यायालयात हजर करतील. सूत्रांनी दिलेल्या माहितीनुसार या प्रकरणात आणखी काही आरोपींचा सहभाग असण्याची शक्यता आहे. व्हिडीओ नेमके कुठे आणि कोणाला पाठवले, याचा तांत्रिक तपास अद्याप पूर्ण झालेला नाही. या कारणांमुळे पोलीस न्यायालयाकडे आरोपींच्या कोठडीत वाढ करण्याची मागणी करणार आहेत.
पीडितांचे मौन
या प्रकरणात अनेक तरुणींचे आयुष्य उद्ध्वस्त झाल्याची चर्चा परिसरात आहे, मात्र गेल्या आठ दिवसांत केवळ एकच पीडित मुलगी धैर्याने तक्रार देण्यासाठी पुढे आली आहे. समाजात बदनामी होण्याच्या भीतीने इतर पीडिता समोर येत नसल्याचे पाहायला मिळत आहे. त्यामुळे पोलिसांना पुराव्यांची साखळी जोडण्यात अडचणी येत आहेत. पोलीस प्रशासनाकडून पीडितांना पुढे येण्याचे आवाहन करण्यात येत असून त्यांचे नाव गुप्त ठेवण्याचे आश्वासन दिले आहे.
