मुलींचे लैंगिक शोषण, 350 अश्लील व्हिडिओ, आरोपीकडून भररस्त्यात वाढदिवस साजरा, पोलिसांनी केक भरवला

Amravati Paratwada Molestation Case: अमरावती जिल्ह्यातील परतवाडा येथील लैंगिक शोषण आणि अश्लील व्हिडिओप्रकरणातील आरोपी मोहम्मद अयाज मोहम्मद तनवीर हा अघ्या 19 वर्षांचा आहे. त्याच्यासोबत त्याच्या इतर आरोपींनाही पोलिसांनी अटक केली आहे. तर आरोपीने परतवाड्यातील एका हमरस्त्यावर त्याचा मध्यरात्री वाढदिवस साजरा करण्यात आला. त्यावेळी पोलिसांनी त्याला केक भरवल्याचा व्हिडिओ सध्या व्हायरल झाला आहे. त्यामुळे याप्रकरणात तपास निःपक्ष कसा होईल असा सवाल करण्यात येत आहे. त्याच्या वाढदिवसाला पोलिसांची हजेरी तपासावरच प्रश्नचिन्ह निर्माण करणारी आहे.

अयाजच्या वाढदिवसाला पोलीस का हजर?

परतवाडा येथील एका हमरस्त्यात हा वाढदिवस साजरा करण्यात आला. व्हिडिओ डिसेंबर 2025 मधील आहे. या व्हिडिओत त्याचे मित्र आणि गुन्ह्यातील आरोपी स्पष्ट दिसत आहेत. तर त्याचवेळी एक सहाय्यक पोलीस निरीक्षक आणि दोन पोलीस कर्मचारी सुद्धा याव्हिडिओत सहभागी झाल्याचे दिसते. पोलिसांनी वाहन थांबवले आणि ते वाढदिवसाच्या सोहळ्यात सहभागी झाले. त्यांनी आरोपीला केकही खाऊ घातल्याचे दिसत आहे. यामुळे आरोपीचे पोलिसांसोबत एकदम घनिष्ठ संबंध असल्याचे समोर येत आहे.

भररस्त्यात वाढदिवसाचा जल्लोष

व्हिडिओत आरोपी आयाज हा भररस्त्यात वाढदिवस साजरा करत असल्याचे दिसते. रस्त्याच्या मध्यभागी एक टेबल आणि त्यावर केक दिसतो. आरोपी केक कापतो. त्याचे मित्र टाळ्या वाजवतात. यावेळी आकाशात आतषबाजी करण्यात येते. मित्र आणि इतर लोक त्याला केक खाऊ घालतात. तर त्याचवेळी एक पोलीस त्याला केक खाऊ घालतो. तर इतर आरोपी पोलिसांना केक खाऊ घालताना दिसतात. भररस्त्यात वाढदिवस साजरा करण्याविषयी विचारणा करण्याऐवजी पोलिसच त्याला केक खाऊ घालत असल्याचे दिसते. त्यामुळे पोलिसांच्या एकूणच वर्तणुकीवर प्रश्नचिन्ह उपस्थित होत आहे.

चंद्रशेखर बावनकुळे यांची पोलिसांसोबत बैठक

अमरावती जिल्ह्यातील परतवाडा शहरातील लैंगिक शोषण आणि अश्लील व्हिडिओ व्हायरल केल्या प्रकरणात वातावरण तापले आहे. उद्या पालकमंत्री चंद्रशेखर बावनकुळे हे पोलीस अधीक्षक विशाल आनंद, एसआयटीचे प्रमुख सहाय्यक पोलीस अधीक्षक शुभम कुमार, गुन्हे शाखेचे पोलीस निरीक्षक व अन्य महत्त्वाच्या पोलीस अधिकाऱ्यांसोबत बारा वाजता बैठक घेणार आहेत. त्यानंतर परतवाडामध्ये देखील बावनकुळे भेट देतील.