धक्कादायकः औरंगाबादेत दुसरीतल्या मुलीची गळफास घेऊन आत्महत्या? मद्यधुंद बापानेच घात केल्याचा संशय
घरात ही मुलगी, तिची मोठी बहीण, आजी आणि वडीलच होते. आजी आणि मोठी बगीण कापूस वेचण्यासाठी शेतात गेले तर वडील घरी असताना तीन वाजेच्या सुमारास मुलीने गळफास घेतल्याचे कळले. त्यामुळे वडिलांवर संशय व्यक्त केला जात आहे.
औरंगाबादः औरंगाबाद जिल्ह्यातल्या करमाड (Karmad, Aurangabad) परिसरात 8 वर्षीय चिमुकलीचा गळफास घेतलेल्या अवस्थेत मृत्यू (Suicide case) झाल्याचे समोर आले आहे. ही आत्महत्या असल्याचे प्रथमदर्शनी दिसून येत असले तरीही या मुलीचे वय पाहता, ती आत्महत्या कशी करेल, असा संशय व्यक्त केला जात आहे. विशेष म्हणजे या घटनेच्या वेळी मुलीचा बाप मद्यधुंद अवस्थेत आढळून (Aurangabad crime) आल्याने बापानेच काहीतरी घात केल्याची शंका नातेवाईकांना आहे.
मुलीच्या गळफासाने गोलटगावात खळबळ
औरंगाबाद जिल्ह्यातल्या करमाडमधील गोलटगाव येथील या घटनेने शहरात खळबळ माजली आहे. सोमवारी दुपारच्या सुमारास गोलटगाव येथील घरात 8 वर्षीय मुलीचा मृतदेह आढळून आला. सदर मुलीने गळफास घेतल्याचे प्रथमदर्शनी दिसत आहे. मात्र करमाड पोलीस घटनास्थळी दाखल झाले त्यावेळी मुलीचा बाप घरात मद्यधुंद अवस्थेत आढळून आला. त्यामुळे बापानेच मुलीला मारल्याचा संशय नातेवाईकांनी व्यक्त केला आहे. या प्रकरणी करमाड पोलीस अधिक तपास करीत आहेत. मात्र काल उघड झालेल्या या घटनेनंतर संपूर्ण गावाला हादरा बसला आहे. सदर मुलीचा मृतदेह शवविच्छेदनासाठी पाठवण्यात आला आहे. विच्छेदनाचा अहवाल आल्यानंतरच या घटनेतील सत्य उघड होईल.
आई दिवाळीनिमित्त माहेरी, घरात वडील, बहीण आणि आजी
पोलिसांनी दिलेल्या माहितीनुसार, ही मुलगी दुसऱ्या इयत्तेत शिकत होती. तिची आई काही दिवसांपूर्वी भाऊबीजेनिमित्त माहेर सोनक पिंपळगाव येथे गेली होती. त्यामुळे घरात ही मुलगी, तिची मोठी बहीण, आजी आणि वडीलच होते. आजी आणि मोठी बगीण कापूस वेचण्यासाठी शेतात गेले तर वडील घरी असताना तीन वाजेच्या सुमारास मुलीने गळफास घेतल्याचे कळले. दरम्यान गावातील पोलीस पाटलांनी घटनेची माहिती पोलिसांना दिली. पोलिसांनी मुलीला घाटी रुग्णालयात दाखल केले असून या प्रकरणी अकस्मात मृत्यूची नोंद करण्यात आली आहे. .पुढील तपास पोलिस उपनिरीक्षक एस एस. बनसोड करीत आहे.
औरंगाबादच्या नव्या बीडबायपास रोडवर अपघात, एकाचा मृत्यू
औरंगाबादः अन्य एका घटनेत शहरात नव्याने बांधण्यात आलेल्या बीड बायपास रोडवर दोन चारचाकी वाहनांची समोरासमोर धडक होऊन या अपघातात राजेंद्र शंकर भादवे याचा मृत्यू झाला. हा अपघात नवीन बीड बायपास रोडवरील आडगाव पुलाजवळ घडला. आडगाव पुलाजवळ महानंदचे दूध घेऊन पिकअप जात होते. त्याच वेळी चारचाकी गाडीतून राजेंद्र हा घरी दूध घेऊन जात होता. दोन्ही वाहने भरधाव वेगात होती. त्यामुळे या धडकेत राजेंद्रच्या गाडीचा समोरचा भाग चक्काचूर झाला. गंभीर दुखापत झाल्याने राजेंद्रला तत्काळ घाटी रुग्णालयात दाखल केले, मात्र डॉक्टरांनी त्याला मृत घेषित केले.
इतर बातम्या-
PHOTO: मराठवाड्यात एसटी कर्मचाऱ्यांचं आंदोलन चिघळलं, औरंगाबादेत डेपोत अर्धनग्र आंदोलन
