एक असं गाव जिथे 41 वर्षांपासून निवडणूक नाही, घराघरात सुखशांती आणि समृद्धी, विकासाची गाडी सुस्साट!

नांदेड :  राज्यात ग्रामपंचायतीच्या निवडणुकीचा नुकताच धुरळा उडाला. सरपंचपदाची निवडणुकही आता सरलीय. गावागावात गावकारभारी खुर्चीवर आरुढ झालेत. अशातही एक असं गाव आहे की ज्या गावात 41 वर्षांपासून साधी निवडणूकही नाही..!, ते गाव आहे नांदेड जिल्ह्यातील आमराबाद ….  (Nanded Amrabad village has not had an election for 41 years)

अर्धापुर तालुक्यातील आमराबाद या गावात 41 वर्षांपासून ग्रामपंचायतची निवडणूक झालेली नाही. ग्रामपंचायतची निवडणूक बिनविरोध निवडून देण्याची परंपरा या गावकऱ्यांनी 41 वर्षांपासून जोपासलीय.

यावेळेला देखील श्यामराव पाटील टेकाळे यांची सरपंचपदी बिनविरोध निवडणूक करण्यात आलीय. इसापूर धरणाच्या पाण्यामुळे सिंचनाची सोय असल्याने गावात समृद्धी नांदत आहे.

गावात गटातटाचे राजकारण नसल्याने गावात मोठ्या प्रमाणात विकासकामे झालेली आहेत. गेल्या 40 वर्षांपासून गावात निवडणूक नको, अशी गावकऱ्यांची भूमिका आहे. त्यामुळे आमराबाद गावाने जिल्ह्यात वेगळी ओळख निर्माण केलीय.

गावात निवडणूक असली की गावकी-भावकीचं राजकारण आलं. जवळची माणसं लांब जाणं आलं आणि लांबची माणसं जवळ येणं… या सगळ्यात अनेकदा नात्यातल्या सख्ख्या माणसांची ताटातूट होते. अनेकदा निवडणुकीच्या कारणाने झालेली भांडणं उभ्या आयुष्यभर मिटत नाही. मग निवडणुकीमुळे भांडणंच होणार असतील, तर त्या निवडणुकीला का सामोरं जायचं, अशी गावकऱ्यांची धारणा आहे.

आपल्या माणसातूनच एक बिनविरोध सरपंच करायचा की जो आपल्या माणसांचं, आपल्या गावाचं भलं करेल. गावच्या विकासात मोलाचा वाटा उचलेल. गावचं हित साधेल. आतापर्यंत गावाला असेच सरपंच लाभले की ज्यांनी गावच्या विकासाला प्राधान्य दिलं. त्यामुळे आम्हाला गावात निवडणूक घ्यावीशी वाटली नाही, असं गावकरी सांगतात. गावकऱ्यांच्या आणि पुढाऱ्यांच्या याच चांगुलपणाने गावच्या विकासाची गाडी मात्र जोरदार धावतीय.

(Nanded Amrabad village has not had an election for 41 years)

हे ही वाचा :

स्फोटकांनी भरलेल्या गाडीचा नंबर अंबानींच्या गाडीशी मिळताजुळता, नव्या खुलाशाने खळबळ?

CCTV Video : मुकेश अंबानींच्या घराजवळ स्फोटकांनी भरलेली गाडी मध्यरात्री 1 वाजता पार्क!