काँग्रेसला पुन्हा धक्का, महापालिका निवडणुकीपूर्वी मोठी बातमी

राज्यात पुढील काही महिन्यांमध्ये स्थानिक स्वराज्य संस्थांच्या निवडणुका होणार आहेत, मात्र त्यापूर्वी आता पक्षांतराला वेग आल्याचं पहायला मिळत आहे. याचा सर्वाधिक फटका हा महाविकास आघाडीला बसत आहे, आतापर्यंत महाविकास आघाडीमधील अनेक दिग्गज नेत्यांसह कार्यकर्त्यांनी महायुतीमध्ये प्रवेश केला आहे. याचा सर्वाधिक फटका हा शिवसेना ठाकरे गटाला बसला आहे, विधानसभा निवडणुकीच्या निकालानंतर महायुतीमध्ये जे इनकमिंग सुरू झालं आहे, ते अजूनही सुरूच आहे. आता ठाण्यातून मोठी बातमी समोर येत आहे.

ठाण्यात काँग्रेसला धक्का बसला आहे, राष्ट्रवादी अजित पवार गटात जोरदार इनकमिंग झालं आहे. काँग्रेससह विविध पक्षातील पदाधिकाऱ्यांनी मोठ्या संख्येनं राष्ट्रवादी अजित पवार गटात प्रवेश केला आहे. मंत्री आदिती तटकरे यांच्या उपस्थितीमध्ये हा पक्षप्रवेश झाला आहे. यावेळी राष्ट्रवादी अजित पवार गटाचे प्रवक्ते आनंद परांजपे यांची देखील उपस्थिती होती.

आदिती तटकरे यांची प्रतिक्रिया 

दरम्यान यावेळी बोलताना आदिती तटकरे यांनी म्हटलं की, आज वेगवेगळ्या पक्षातील पदाधिकाऱ्यांनी आमच्या पक्षामध्ये प्रवेश केला आहे. अजित पवार यांच्या मार्गदर्शनाखाली राष्ट्रवादी पक्षामध्ये काम करण्याची त्यांना आवड आहे,  म्हणून त्यांनी या ठिकाणी आज पक्ष प्रवेश केला. प्रत्येक पक्षाची काम करण्याची पद्धत वेगळी असते. अनेक वर्षांपासून आम्ही  राष्ट्रवादी पक्षाची जी ताकद आहे ती वाढवण्याचे काम आम्ही करत आहोत.   महाराष्ट्रमध्ये काम करत असताना ज्या काही महापालिका आहेत, त्या अधिकाधिक कशाप्रकारे विकसित होतील त्या अनुषंगाने आम्ही काम करत आहोत, असं यावेळी तटकरे यांनी म्हटलं आहे.

दरम्यान पुढे बोलताना त्या म्हणाल्या की, कुठलीही मतदान यादी गृहीत न धरता महिला सक्षमीकरणासाठी देखील आम्ही काम करत आहोत. अधिकाधिक महिलांना उद्योग व्यावसाय कसा करता येईल? त्यांना आर्थिक सारक्षर कसं बनवता येईल?  त्यासाठी आमचे प्रयत्न सुरू असल्याचं यावेळी तटकरे यांनी म्हटलं आहे, त्यांच्या उपस्थितीमध्ये आज ठाण्यात पक्षप्रवेश पार पडला.