लाडकी बहीण योजनेच्या केवायसीसाठी सेक्सची मागणी करणारा गोकुळ चव्हाण कोण? या आधीही एका महिलेला… धक्कादायक माहिती समोर

जळगावातून धक्कादायक बातमी समोर आली आहे. लाडकी बहीण योजनेच्या केवायसीच्या बहाण्याने गोकुळ चव्हाण या व्यक्तीने महिलेकडे शरीरसुखाची केल्याचे समोर आले आहे. तसेच त्याने अन्य एका महिलेकडे प्रेमसंबंधाची मागणी केल्याची माहितीही समोर आली आहे. त्यानंतर 38 वर्षीय गोकुळ रमेश चव्हाण याच्याविरुद्ध शहर पोलिस ठाण्यात महिलांच्या विनयभंगाचा गुन्हा दाखल करण्यात आला आहे. हा गोकुळ चव्हाण कोण आहे ते सविस्तर जाणून घेऊयात.

समोर आलेल्या माहितीनुसार लाडकी बहीण योजनेची केवायसी करायची असल्याचे सांगून गोकुळ चव्हाण महिलेच्या घरी गेला आणि कागदपत्रे घेत शरीरसुखाची मागणी केली. त्यानंतर त्याने अन्य एका महिलेला निवृत्ती वेतन पुन्हा सुरू करून देतो असे म्हणत प्रेमसंबंधाची मागणी केल्याचे फिर्यादीत नमूद करण्यात आले आहे. आता या प्रकरणात गुन्हा दाखल झाल्यानंतर गोकुळ चव्हाण फरार असून त्याचा पोलीस शोध घेत आहे. या प्रकरणी रोहिणी खडसे यांनी सत्ताधाऱ्यांवर टीका करत आरोपीवर कठोर कारवाई करण्याची मागणी केली आहे

प्रकरण कसे घडले?

गोकुळ चव्हाण याच्याविरोधात 35 वर्षीय पाडित महिलेने पोलिस ठाण्यात तक्रार दिली आहे. तक्रारीनुसार, पीडित महिलेचे नोव्हेंबर आणि डिसेंबर 2025 या दोन महिन्यांचे लाडकी बहीण योजनेचे पैसे खात्यावर जमा झाले नव्हते. त्यासाठी महिलेला केवायसी करावयाची असल्याने तिने तिचे पतीचे मित्र गोकुळ चव्हाण यांना सांगितले. 25 जानेवारी 2026 रोजी केवायसी साठी कागदपत्रे घेण्यासाठी गोकुळ चव्हाण महिलेच्या घरी आला. कागदपत्र घेतल्यावर चव्हाण याने लाडकी बहिण योजनेचे काम करून देतो पण शारीरिक संबंध ठेवण्याची मागणी महिलेकडे केली. कोणालाही माहीत पडू देणार नाही असे देखील चव्हाण महिलेला यावेळी बोलला.

महिलेने सदरचा प्रकार तिच्या पतीला सांगितल्यानंतर तिच्या पतीने गोकुळ चव्हाण याला समज दिली आणि पुन्हा घराकडे येऊ नये अशी तंबी दिली. त्यानंतरही गोकुळ चव्हाण पुन्हा पुन्हा महिलेच्या घरासमोर उभा राहून तिला बघायचा, तिचा पाठलाग करत होता. या प्रकाराला कंटाळून आठ एप्रिल रोजी महिलेने गोकुळ चव्हाण यांच्याविरुद्ध जळगाव शहर पोलीस ठाण्यात तक्रार दिली. यापूर्वी देखील पीडित महिला राहत असलेल्या परिसरातीलच अन्य एका महिलेला निवृत्ती वेतन पुन्हा सुरू करून देतो, असे म्हणत चव्हाण याने प्रेमसंबंधाची मागणी केल्याचे फिर्यादीत म्हटले आहे.

कोण आहे गोकुळ चव्हाण?

गोकुळ चव्हाण हा सामाजिक कार्यकर्ता असून त्याचे जळगाव शहरात ऑनलाइन सेतू सुविधा केंद्र असल्याची माहिती पोलिसांनी दिली आहे. पतीचा मित्र असल्याने पीडित महिलेने त्याला केवायसी करण्यासंदर्भात माहिती सांगितली होती. याच दरम्यान हा प्रकार घडल्याची माहिती समोर आली आहे.