Devendra Fadnavis : उद्धव ठाकरे स्वत:च्या शिवसेनेत..रेजीम चेंज बद्दल बोलणाऱ्या उद्धव ठाकरेंना मुख्यमंत्र्यांच सडेतोड प्रत्युत्तर

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी दिल्लीत मागच्या काही दिवसांपासून सातत्याने आंदोलनं सुरु आहे. काँग्रेस, कॉकरोच जनता पार्टीने आक्रमक भूमिका घेतली आहे. हळूहळ आता या आंदोलनादरम्यान रेजीम चेंज विषयी भाष्य चालू झालं आहे. परवा अभिजीत दीपके यांच्या पत्रकार परिषदेत सुप्रीम कोर्टाचे ज्येष्ठ वकिल प्रशांत भूषण हे रेजीम चेंजबद्दल जाहीरपणे बोलले. हो, आम्हाला सत्ता बदल हवाय असं ते म्हणाले. आता उद्धव ठाकरे सुद्धा हेच बोलले आहेत. त्यांना मुख्यमंत्री देवेंद्र फडणवीस यांनी आपल्या शैलीत उत्तर दिलं.

“पहिली गोष्ट म्हणजे उद्धव ठाकरे स्वत: शिवसेनेत रेजीम चेंज रोखू शकले नाहीत. ते दुसऱ्या कुठल्या रेजीम चेंजबद्दल बोलतयात मला माहित नाही. जेव्हा त्यांच्या पक्षाने हिंदुत्व सोडलं, हिंदूह्दयसम्राट शिवसेनाप्रमुख बाळासाहेब ठाकरे यांचे विचार सोडले तेव्हा अशी परिस्थिती आली की, ज्यांना बाळासाहेबांच्या विचारांवर चालायचं होतं, त्यांनी खरी शिवसेना बनवली” असं मुख्यमंत्री देवेंद्र फडणवीस बोलले. “सर्वात मोठी गोष्ट ही आहे की, मी स्पष्टपणे सांगितलय की, संविधानाशी लढणं बंद करा. इथे निर्णय संसदेत होतील. संविधानाने होईल, रस्त्यावर निर्णय होणार नाही. लोकाशाहीत निर्णय निवडणुकीने होईल. मोदी सरकार आहे, पुन्हा निवडून येईल” असं मुख्यमंत्री फडणवीस म्हणाले.

इट्स डन ब्रो, सर्वकाही जाहीर झालय

प्रशांत भूषण यांच्या रेजीम चेंजच्या वक्तव्यावर सुद्धा देवेंद्र फडणवीस यांनी पलटवार केला होता. “इट्स डन ब्रो, सर्वकाही जाहीर झालय. अखेर हे सर्वकाही सत्ता बदलासाठी आहे. शेवटी मनात होतं ते ओठांवर आलच” असं फडणवीस यांनी पोस्टमध्ये म्हटलं होतं. नागपूर पदवीधर मतदारसंघ निवडणुकीच्या पार्श्वभूमीवर मुख्यमंत्री देवेंद्र फडणवीस आज नागपूरमध्ये आहेत. नागपूरमध्ये आलेले मुख्यमंत्री देवेंद्र फडणवीस आज रेशीमबाग येथील राष्ट्रीय स्वयंसेवक संघाच्या मुख्यालयात आले होते. तिथे येऊन त्यांनी राष्ट्रीय स्वयंसेवक संघाचे सरसंघचालक मोहन भागवत यांची भेट घेतली. सध्या देशातील राजकीय वातावरण तापलं आहे.