Maharashtra Rain Update : झाडं कोसळली, लोकांची ताराबंळ, महाराष्ट्रात पाऊस परतला, सांगली ते धुळे..कुठं कुठं सरी बरसल्या?

maharashtra rain update

Maharashtra Rain Update : राज्यात सध्या दुष्काळ आहे. दुष्काळझळांमुळे शेतकरी होरपळून निघालाय. शेतातील हिरवेगार पीक उन्हामुळे जळून खाक झालेय. खरीप हंगाम हातातून गेल्यामुळे आता शेतकऱ्यांना सरकार वेगवेगळ्या मार्गाने मदत करतंय. दुसरीकडे खरीप हंगाम गेलेला असला तरी रब्बी हंगामात तरी चांगले पीक यावे, अशी शेतकरी आस लावून बसलाय. आगामी काळात चांगला परतीचा पाऊस व्हावा, अशी प्रार्थना शेतकरी करतोय. दरम्यान, शेतकऱ्यांसाठी आता चांगली बातमी समोर आलीय. राज्यातील काही जिल्ह्यांत पावसाने हजेरी लावलीय. त्यामुळे आता शेतकऱ्यांत समाधान व्यक्त केले जातेय. राज्यात कुठे-कुठे पाऊस झालाय, तसेच आगामी काळात पावसाची शक्यता काय? ते जाणून घेऊ या…

रत्नागिरी जिल्ह्यात पाऊस आला, नागरिक सुखावले

रत्नागिरी जिल्ह्यातील चिपळूण परिसरात अडीच महिन्यांच्या प्रतीक्षेनंतर पावसाने दमदार हजेरी लावली आहे. काल रात्री आठच्या सुमारास सुरू झालेल्या पावसामुळे शेतकरी आणि नागरिक सुखावले आहेत. उकाड्याने हैराण झालेल्या नागरिकांना गारवा मिळाला आहे. मात्र, रत्नागिरी, संगमेश्वरसह जिल्ह्यातील अन्य तालुक्यांमध्ये अद्याप पावसाची प्रतीक्षा कायम आहे.

सांगली जिल्ह्यातही पावसाच्या सरी

सांगली जिल्ह्यातही ठिकठिकाणी पावसाने हजेरी लावली आहे. कडेगाव आणि तासगाव तालुक्यातल्या अनेक भागात जोरदार पाऊस पडला आहे. कडेगाव तालुक्यातील देवराष्ट्रे, वडीया, रायबाग तासगावच्या बलगवडे, कवठेमहांकाळ आणि डफळापूरसह आसपासच्या परिसरामध्ये पाऊस पडला आहे. सांगली जिल्ह्यामध्ये सकाळपासून अनेक ठिकाणी ढगाळ वातावरण निर्माण झालं होतं. त्यानंतर दुपारपासून अनेक भागात पावसाने हजेरी लावली आहे. या पावसामुळे शेतकरी काहीसा सुखावला आहे.

कोल्हापुरात पाऊस, भाविक ओलेचिंब

कोल्हापूर जिल्ह्यातही पावसाने हजेरी लावलीय. येथे काही ठिकाणी पावसाच्या जोरदार सरी आल्या. या पावसामुळे अंबाबाई मंदिरात देवीच्या दर्शनासाठी आलेल्या भाविकांची एकच तारांबळ उडाली. आज सुट्टीचा दिवस असल्याने भाविकांनी मंदिरात मोठ्या प्रमाणात गर्दी केली होती. अचानक पाऊस आल्याने भाविक ओलेचिंब झाल्याचे पाहायला मिळाले.

दोन-अडीच महिन्यांनंतर धुळ्यात पावसाची हजेरी

दुसरीकडे धुळे जिल्ह्यात तब्बल दोन ते अडीच महिन्यांच्या खंडानंतर पावसाने हजेरी लावली. साक्री तालुक्यातील पिंपळनेर, कुडाशी, वारसा, मोहगाव, बल्हाणे, सामोडे आणि बारीपाडा परिसराला वादळी पावसाने झोडपले. अचानक आलेल्या पावसामुळे जनजीवन विस्कळीत झाले. काही ठिकाणी झाडे कोसळली आहेत. या झालेल्या पावसामुळे काही ठिकाणी पिण्याच्या पाण्याच्या प्रश्न मिटण्यासाठी शक्यता आहे.