Manoj Jarange Patil : मनोज जरांगे पाटील यांच्या दसरा मेळाव्यामुळे शिंदे शिवसेनेतील गटा-तटाचं राजकारण उघड, एका गटाचा विरोध असताना दुसऱ्या गटाने..

अशोक काळकुटे, प्रतिनिधी : मराठा आंदोलक मनोज जरांगे पाटील यांच्या उपस्थितीत आज नारायणगडावर दसरा मेळावा पार पडणार आहे. मराठा समाज बांधवाना मनोज जरांगे पाटील संबोधित करणार आहेत. सकाळी 10 वाजता मनोज जरांगे नारायण गडाच्या दिशेने रवाना होतील. राज्यभरातून मराठा समाज बांधव आज जरांगे पाटलांच्या दसरा मेळाव्यासाठी नारायण गडावर येणार आहेत. नारायण गडावरून मराठा आरक्षण आंदोलनाला नवी दिशा मिळणार का? आणि जरांगे कोणती भूमिका स्पष्ट करणार हे पाहणं महत्त्वाचं ठरणार आहे. नारायण गडावरील दसरा मेळावा याकडे केवळ मराठा समाजाचाच नव्हे तर संपूर्ण राज्याचे लक्ष लागले आहे. मनोज जरांगे पाटील यांच्या दसरा मेळाव्याला शिंदेंच्या शिवसेनेचा विरोध आहे. विरोधानंतरही दसरा मेळावा होत असताना माजी मंत्री तानाजी सावंतांच्या सहकाऱ्यांकडून जेवण, पाण्याची व्यवस्था करण्यात आली आहे.

मनोज जरांगे पाटील यांच्या दसरा मेळाव्याला सुरुवातीला शिंदेंच्या शिवसेनेच्या जिल्हाप्रमुखाकडून विरोध करण्यात आला. विरोधानंतर देखील शेकडो एकरवर नारायण गडावर हा दसरा मेळावा होत आहे. विरोधानंतर ही दसरा मेळावा होत असताना आज गडावर जाणाऱ्या लाखो लोकांच्या जेवण, पाण्याची व्यवस्था मंत्री तानाजी सावंत यांच्या सहकाऱ्यांकडून करण्यात आली आहे. एका गटाकडून विरोध तर दुसऱ्या गटाकडून मदत याची चर्चा होत आहे. कुणीही विरोध करू द्या आम्ही मात्र पाटलांसोबत आहोत, आज आम्ही मंत्री तानाजीराव सावंत साहेबांच्या सहकार्यातून लाखो लोकांच्या जेवण,पाण्याची व्यवस्था केली आहे, असं या सहकाऱ्यांनी म्हटलं आहे.

जशास तसे उत्तर दिले जाईल

मनोज जरांगे पाटील यांच्या दसरा मेळाव्याला शिवसेनेचा विरोध असल्याने बीडमधील वातावरण तापलं आहे. मराठवाड्यात सध्या दुष्काळ आहे. त्यामुळे दसरा मेळाव्याला विरोध केला जात आहे. मुंबईतील शिवसेनेचा दसरा मेळावा होणार आहे. त्या ठिकाणी दुष्काळ नाही असे शिवसेना जिल्हाप्रमुख स्वप्निल गलधर यांनी म्हटले आहे. श्री क्षेत्र नारायण गडावरील जरांगे पाटील यांच्या दसरा मेळाव्यातून एकनाथ शिंदेंबद्दल बोलल्यास जशास तसे उत्तर दिले जाईल असा इशाराच शिवसेना जिल्हाप्रमुख स्वप्निल गलधर यांनी दिला आहे.