अंतरवालीहून परतताना मराठा आंदोलकाचा मृत्यू, उभ्या ट्रकला कारची धडक

काल मराठा आंदोलक मनोज जरांगे पाटील यांनी मराठा आरक्षणासाठी जालना जिल्ह्यातील अंतरवाली सराटी येथे उपोष पुकारले होते. अंतरवाली येथील एका शेतात रखरखत्या उन्हात बाज टाकून जरांगे पाटील यांनी उपोषणाला सुरुवात केली. अनेक मराठा आंदोलक अंतरवालीमध्ये दाखल झाली होते. मात्र, मध्यरात्री मनोज जरांगे यांच्या मागण्या सरकारने पूर्ण केल्यानंतर उपोषणाला स्थगिती दिली. त्यानंतर आंदोलन संपवून अंतरवाली सराटी येथून इंदापूरकडे परत जात असताना एका आंदोलकाचा भीषण अपघात झाला. या अपघातामध्ये त्याचा दुर्दैवी मृत्यू झाला आहे.

मराठा आंदोलकाचा दुर्दैवी मृत्यू

मराठा आंदोलक आंदोलन संपल्यानंतर घरी परतत असताना बीड येथे त्यांचा अपघात झाला. परतीच्या प्रवासादरम्यान आंदोलकांच्या चारचाकी वाहनाने एका उभ्या ट्रकला पाठीमागून जोरदार धडक दिली. या अपघातात इंदापूरमधील मराठा आंदोलकाचा दुर्दैवी मृत्यू झाला आहे. तर दोन जण गंभीर जखमी झाले आहेत. हा अपघात बीड जवळील मांजरसुंबा परिसरात घडला आहे.

दोघेजण गंभीर जखमी

इंदापूर तालुक्यातील रामचंद्र शंकर जमदाडे हे आपले सहकारी संतोष माने आणि बिपीन मोरे यांच्यासोबत अंतरवाली सराटी येथून रात्री उशिरा कारने घरी परतत होते. त्यावेळी बीडमधील मांजरसुंबा येथे रस्त्याच्या कडेला उभ्या असलेल्या एका ट्रकला त्यांच्या कारने पाठीमागून जोरदार धडक दिली. हा अपघात इतका भीषण होता की यामध्ये रामचंद्र जमदाडे यांचा जागीच दुर्दैवी मृत्यू झाला, तर त्यांचे इतर दोन सहकारी गंभीर जखमी झाले आहेत.

या घटनेची माहिती मिळताच बीडमधील स्थानिक मराठा समन्वयकांनी तातडीने रुग्णालयात धाव घेतली. त्यांनी दोन्ही जखमी कार्यकर्त्यांना बीडच्या एका खाजगी रुग्णालयात उपचारासाठी दाखल केले असून त्यांच्या संपूर्ण उपचाराची जबाबदारीही या समन्वयकांनी स्वतःवर घेतली आहे.