ठाणे-दिवा कॉरिडॉरदरम्यान मेगाब्लॉक; लोकलसेवा 18 तासांसाठी ठप्प, अनेक एक्सप्रेस गाड्याही रद्द

मुंबकरांसाठी महत्त्वाची बातमी आहे. मध्य रेल्वेकडून आज ठाणे ते दिवा कॉरिडॉरदरम्यान मेगाब्लॉक घेण्यात आला आहे. यादरम्यान ठाणे ते दिवा मार्गावरील लोकलसेवा तब्बल 18 तासांसाठी बंद राहणार आहे. सोमवारी पहाटे 2 वाजेपर्यंत या मार्गावरील लोकल सेवा ठप्प राहणार असल्याची माहिती रेल्वे प्रशासनाच्या वतीने देण्यात आली आहे.

लोकल ट्रेन

TV9 मराठी डिजीटल टीम | Edited By: Ajay Deshpande | Updated on: Dec 19, 2021 | 11:56 AM

मुंबई : मुंबकरांसाठी महत्त्वाची बातमी आहे. मध्य रेल्वेकडून आज ठाणे ते दिवा कॉरिडॉरदरम्यान मेगाब्लॉक घेण्यात आला आहे. यादरम्यान ठाणे ते दिवा मार्गावरील लोकलसेवा तब्बल 18 तासांसाठी बंद राहणार आहे. सोमवारी पहाटे 2 वाजेपर्यंत या मार्गावरील लोकल सेवा ठप्प राहणार असल्याची माहिती रेल्वे प्रशासनाच्या वतीने देण्यात आली आहे. पाचव्या आणि सहाव्या रेल्वे मार्गाचे काम सुरू आहे, यासाठी हा मेगाब्लॉक घेण्यात आला आहे.

प्रवाशांसाठी जादा बस

दरम्यान तब्बल अठरा तास मेगाब्लॉक असल्याने प्रवासाचे वेळापत्रक कोलमडण्याची शक्यता आहे. या मार्गावर प्रवास करणाऱ्या प्रवाशांची गैरसोय होऊ नये, यासाठी रेल्वे विभाग आणि महापालिका अधिकाऱ्यांच्या वतीने स्पेशल बसची देखील व्यवस्था करण्यात आली आहे. रेल्वे मार्गाच्या विस्तारीकरणाचे काम चालू असून, त्यासाठी अठरा तासांचा मेगाब्लॉक घेण्यात येत आहे. सोमवारी रात्री दोन नंतर रेल्वे सेवा पुन्हा सुरळीत सुरू होईल. यादरम्यान प्रवाशांची गैरसोय टाळण्यासाठी अतिरिक्त बसेसची व्यवस्था करण्यात आल्याचे रेल्वे विभागाने आपल्या निवेदनामध्ये म्हटले आहे.

रद्द झालेल्या एक्सप्रेस गाड्या

दरम्यान या काळात लोकसोबतच काही एक्सप्रेस गाड्यादेखील रद्द करण्यात आल्या आहेत. यामध्ये मुंबई-पुणे-मुंबई डेक्कन एक्सप्रेस, मुंबई-मनमाड-मुंबई पंचवटी एक्सप्रेस, मुंबई-जालना-मुंबई जनशताब्दी एक्सप्रेस, मुंबई-आदिलाबाद नंदीग्राम एक्सप्रेस, मुंबई-पुणे-मुंबई डेक्कन क्वीन, मुंबई-अमरावती एक्सप्रेस, मुंबई-गदग एक्सप्रेस, मुंबई-नांदेड एक्सप्रेस,मुंबई-कोल्हापूर कोयना एक्सप्रेस या गाड्यांचा समावेश आहे.