…म्हणूनच इरफानने महाराष्ट्र नवनिर्माण चित्रपट सेनेचं सदस्यत्व स्वीकारलं असेल : राज ठाकरे

मुंबई : हरहुन्नरी अभिनेता इरफान खानचं निधन झालं. कॅन्सरविरुद्ध लढत असलेल्या इरफानला (Raj Thackerays reaction on Irrfan Khan) काल मुंबईतील कोकिलाबेन रुग्णालयात दाखल केलं होतं. उपचारादरम्यान आज त्याची प्राणज्योत मालवली. इरफानच्या अचानक जाण्याने देशभरातून हळहळ व्यक्त केली जात आहे. राष्ट्रपतींपासून ते पंतप्रधानांपर्यंत, राज्यपालांपासून मुख्यमंत्र्यांपर्यंत सर्वांनी शोक व्यक्त केला.

इरफान खानच्या निधनावर मनसे अध्यक्ष राज ठाकरे यांनी प्रतिक्रिया व्यक्त केली आहे. सोशल मीडियावर राज ठाकरे यांनी आपल्या भावना मांडल्या. “इरफान लक्षात राहील कारण पडद्यावर तो वावरताना आपल्यातला प्रत्येक माणूस स्वतःला त्याच्याशी एकरुप करु शकायचा. ही एकरुपताच इरफानला दीर्घकाळ स्मरणात ठेवेल”, असं राज ठाकरे म्हणाले. (Raj Thackerays reaction on Irrfan Khan)

राज ठाकरे यांची फेसबुक पोस्ट जशीच्या तशी

शरीर सौष्ठव, चकचकीत चेहरा, नृत्याचं अंग नसलं तरी पडद्यावर जे अंगविक्षेप केले जातील त्याला नृत्य म्हणणं आणि अतर्क्य दिसणाऱ्या, वागणाऱ्या खलनायकांना संपवण्यासाठी अतर्क्य गोष्टी करणाऱ्या बॉलिवूड मधल्या नायकांचा काळ सुरु असताना इरफान खान सिनेमात भूमिका मिळाव्यात म्हणून धडपडत होता.

त्याची अभिनयाची सहज-सुलभता नसिरुद्दीन शाह, ओम पुरी आणि अजून मागे गेलं तर बलराज सहानी ह्यांच्या पठडीतली. पण ९० च्या दशकात मुळात हिंदी चित्रपट आणि अभिनय ह्यांच्यात फारकत असण्याचा काळ होता. ह्या वावटळीत पण इरफान इथे टिकून राहिला.

पुढे नव्या शतकात सिनेमातले अतर्क्य खलनायक मागे पडले आणि माणसातील उणिवा, महत्त्वाकांक्षा, ह्याही माफक का होईना खलनायकी असू शकतात ह्याची जाणीव नव्या दिग्दर्शकांना होत होती आणि त्यातून इरफानची ‘मकबूलीयत’ सुरु झाली. हिंदी चित्रपटसृष्टीच्या साचेबद्ध यशस्वी नटांच्या पठडीतलं आपल्याकडे काही नव्हतं ह्याची जाणीव इरफानला असावी आणि त्याची उणीव त्याने संवाद फेकीने, डोळ्यातून व्यक्त होण्याच्या ताकदीने भरून काढली. एखादं किडकिडीत व्यक्तिमत्व पण पडदा व्यापून टाकू शकतं, हे इरफानने दाखवून दिलं. सहज अभिनयाची परंपरा हिंदी चित्रपटसृष्टीत इरफानने प्रवाहित ठेवली.

इरफान लक्षात राहील कारण पडद्यावर तो वावरताना आपल्यातला प्रत्येक माणूस स्वतःला त्याच्याशी एकरूप करू शकायचा. ही एकरूपताच इरफानला दीर्घकाळ स्मरणात ठेवेल. माझ्या पक्षाची चित्रपट शाखा कलाकारांसाठी प्रामाणिकपणे काम करते, हेच इरफानना भावलं असणार आणि म्हणून त्यांनी महाराष्ट्र नवनिर्माण चित्रपट सेनेचा सदस्यत्व स्वीकारलं असणार. अशा ह्या चतुरस्त्र अभिनेत्यास आणि सहकाऱ्यास भावपूर्ण श्रद्धांजली.
—
राज ठाकरे