Mumbai Rain | मुंबईत जोरदार पाऊस, ‘हा’ मुख्य आणि महत्वाचा मार्ग बंद

प्रातिनिधिक फोटो

Image Credit source: ANI

मुंबई | मुंबई शहर आणि आसपासच्या परिसरात अनेक दिवसांच्या प्रतिक्षेनंतर जून महिन्यातील शेवटच्या काही दिवसांमध्ये मान्सूनची एन्ट्री झाली. पावसाने लेट पण थेट एन्ट्री घेतली. जून महिन्याच्या या अखेरच्या आठवड्यापासून जोरदार पाऊस बरसतोय. अशातच आता पावसाने आज 28 जून बुधवारी सकाळपासून मुंबईतील विविध ठिकाणी हजेरी लावली आहे. पावसाने मुंबई आणि ठाणे शहराला चांगलंच झोडपून काढलंय. या पावसामुळे मुंबईतील अनेक भागात पाणी साचायला सुरुवात झाली आहे. या पावसामुळे मुंबईतील महत्वाचा मार्ग आता बंद करण्यात आला आहे.

पावसामुळे अंधेरी सबवे वाहतूकीसाठी बंद करण्यात आला आहे. अंधेरी परिसरात पावसामुळे मोठ्या प्रमाणात पाणी साचलंय. शनिवारी 24 जून रोजी झालेल्या पावसामुळे या अंधेरी सबवेत मोठ्या प्रमाणात पाणी साचलं होतं. या पाण्यात अनेक गाड्या अडकल्या होत्या. त्यामुळे आता कोणताही अनुचित प्रकार घडू नये यासाठी खबरदारी घेत पालिका प्रशासनाने हा अंधेरी सबवे बंद करण्याचा निर्णय घेतला आहे.

दर पावसाळ्यात थोडाशा पाण्यामुळे हा अंधेरी सबवे भरतो. परिणामी वाहतूक बंद करावी लागते. यंदा महापालिका प्रशासनाने अंधेरी सबवेतील पाण्याचा निचरा करण्यासाठी मोठी तयारी केल्याचा दावा केला होता. मात्र पालिकेचा हा दावा पावसाच्या पाण्यासोबत वाहून गेल्याचं दिसतंय.

मुंबईकरांना मनस्ताप

अंधेरी पूर्व-पश्चिम जोडणाऱ्या गोखले पूलाचं काम गेल्या अनेक महिन्यांपासून सुरु आहे. त्यामुळे अंधेरी पूर्व-पश्चिम अशी येजा करण्यासाठी अंधेरी सबवे या मार्गे प्रवास केला जातो. पण पावसामुळे हा सबवे बंद करण्यात आलाय. त्यामुळे आता जोवर पाण्याचा निचरा होत नाही, तोवर अंधेरी सबवे मार्ग खुला केला जाणार नाही. त्यामुळे आता मुंबईकरांना जेव्हीएलआर (ट्रॉमा सेंटर), कॅप्टन गोर उड्डानपूल (विलेपार्ले) आणि मिलन सबवे या पर्यायी मार्गाने प्रवास करावा लागेल.

पालिका प्रशासन अलर्ट

मुंबईतील पावसाच्या पार्श्वभूमीवर महापालिका प्रशासन अलर्ट झालंय.पालिका आयुक्त इक्बाल सिंह चहल यांनी मिठी नदी परिसराची पाहणी केली. चहल यांनी बीकीसेतील मिठी नदी परिसराची पाहणी केली. चहल यांनी यावेळेस पावसाळी उपययोजनांबाबत माहिती घेतली.

मुंबईत किती पाऊस?

दरम्यान मुंबईत 27 जून सकाळी 8 ते 28 जून सकाळी 8 या 24 तासांच्या कालावधीत मुंबईत कधी आणि किती मिमी पाऊस झाला आहे, याबाबतची माहिती मुंबई महापालिकेने ट्विटद्वारे दिली आहे.

रिमझिम ते बदाबदा पाऊस

मुंबई महापालिकेने दिलेल्या माहितीनुसार या 24 तासांच्या कालावधीत मुंबई शहरात एकूण 7 मिमी पाऊस झालाय. तर पूर्व उपनगरात 28 आणि पश्चिम उपनगरात सर्वाधिक 29 मिमी इतका पाऊस झालाय.