Ramdas Kadam : रामदास कदम शिवसेना नेतेपदाचा राजीनामा देणार?; थोड्याच वेळात घोषणेची शक्यता
शिवसेना नेते रामदास कदम हे शिवसेना नेतेपदाचा राजीनामा देण्याची शक्यता आहे. ऑडिओ क्लिप प्रकरणामुळे रामदास कदम यांच्यावर पक्षश्रेष्ठी नाराज आहेत.
मुंबई: शिवसेना नेते रामदास कदम हे शिवसेना नेतेपदाचा राजीनामा देण्याची शक्यता आहे. ऑडिओ क्लिप प्रकरणामुळे रामदास कदम यांच्यावर पक्षश्रेष्ठी नाराज आहेत. त्यामुळे कदम हे नाराज असून ते शिवसेना नेतेपदाचा राजीनामा देण्याची शक्यता आहे. थोड्याच वेळात ते याबाबतची घोषणा करू शकतात. त्यामुळे त्यांच्या पत्रकार परिषदेकडे संपूर्ण राज्याचं लक्ष लागलं आहे.
रामदास कदम यांची एक कथित ऑडिओ क्लिप व्हायरल झाली होती. या क्लिपमधून ते शिवसेना परिवहन मंत्री अनिल परब यांच्याविरोधात कारवाई करत असल्याचं दिसून येत आहे. परब यांचा रिसॉर्ट पाडण्यासाठी कदम हे भाजप नेते किरीट सोमय्या यांना मदत करत असल्याचं दिसून येत आहे. या क्लिप व्हायरल झाल्याने एकच खळबळ उडाली होती. त्यावर रामदास कदम यांनी स्पष्टीकरण देताना ही क्लिप आपली नसून कुणाचं तरी हे षडयंत्रं असल्याचं म्हटलं होतं.
विधान परिषदेतून पत्ता कापला
ही ऑडिओ क्लिप व्हायरल झाल्यानंतर शिवसेनेने रामदास कदम यांना विधान परिषदेचं तिकीट नाकारलं होतं. त्यांच्या ऐवजी सुनील शिंदे यांना विधान परिषदेचं तिकीट देण्यात आलं होतं. मात्र, त्यावरही कदम यांनी मी कोणतीच निवडणूक लढणार नसल्याचं जाहीर केल्याने विधान परिषदेत जाण्याचा प्रश्नच नाही, असं विधान केलं होतं.
समर्थकांचे पत्ते कापले
दरम्यान, दोन दिवसांपूर्वीच शिवसेनेने रत्नागिरीतील शिवसेना पदाधिकाऱ्यांच्या नियुक्त्या केल्या. या नवनियुक्त्यांमधून कदम समर्थकांना डावलण्यात आलं. कदम यांच्यासाठी हा मोठा धक्का मानला जात आहे. कदम यांचे चिरंजीव योगेश कदम हे आमदार आहेत. असं असतानाही कदम समर्थकांना संघटनेच्या कार्यकारिणीतून डावलण्यात आल्याने कदम हे अस्वस्थ असल्याचं सांगितलं जातं. त्यामुळेच ते आज शिवसेना नेतेपदाचा राजीनामा देणार असल्याचं सांगितलं जात आहे. थोड्याच वेळात ते पत्रकार परिषद घेऊन त्याीच घोषणा करण्याची शक्यता सूत्रांनी वर्तवली आहे.
VIDEO : महत्त्वाच्या घडामोडी | 18 December 2021#FastNews #Newshttps://t.co/PXbmIaoSCq pic.twitter.com/ka62YJvtyt
— TV9 Marathi (@TV9Marathi) December 18, 2021
संबंधित बातम्या:
उद्धव ठाकरे मुख्यमंत्री नसते तर तुम्ही कुठे असता?, शिवसेनेच्या खासदाराचा अशोक चव्हाणांना सवाल
