स्नॅपचॅटवर धमकी! नंतर थेट अंगावर घातली कार, मुंबईतील हायप्रोफाइल एरियात धक्कादायक घटना, CCTV समोर

मुंबईच्या लोखंडवाला परिसरात एक धक्कादायक घटना घडली आहे. एका २९ वर्षीय व्यक्तीने मॉडेल तरुणीच्या अंगावर थेट कार घालण्याचा प्रयत्न केला होता. पण तेवढ्यात काहीजण त्या मॉडेलच्या मदतीला धावून आले. आरोपीने त्यांच्या अंगावर देखील गाडी घालण्याचा प्रयत्न केला. ही संपूर्ण घटना सीसीटीव्ही कॅमेऱ्यात कैद झाली असून, परिसरात खळबळ उडाली आहे. सध्या या प्रकरणात पोलिसात तक्रार दाखल करण्यात आली असून चौकशी सुरु आहे.

नेमकं प्रकरण काय आहे?

सोमवारी रात्री साडेनऊच्या सुमारास जोगेश्वरी पश्चिमेकडील लोखंडवाला येथील अरीना बिल्डिंगच्या गेटजवळ ही घटना घडली. पीडित मॉडेल (नाव: डायना सईद डेबस्तानी) इमारतीच्या प्रवेशद्वाराजवळ उभी असताना आरोपी मोहम्मद शकील शेख याने स्कोडा कार अचानक तिच्या दिशेने वेगाने नेली. कारचा जोरदार धक्का बसल्याने मॉडेल कारच्या बोनेटवर आदळली आणि काही अंतर फरफटत गेली. या हल्ल्यात तिला किरकोळ दुखापत झाली आहे. घटनेदरम्यान तिच्या मदतीला धावलेल्या दोन व्यक्तींच्या अंगावरही आरोपीने कार घालण्याचा प्रयत्न केला, मात्र त्यांना धोका टळला.

मॉडेलला मिळाली होती धमकी?

पोलिस तक्रारीनुसार, आरोपी गेल्या नऊ महिन्यांपासून मॉडेलबद्दल तिच्या मित्र-मैत्रिणी आणि कुटुंबीयांमध्ये अफवा पसरवत होता. यामुळे दोघांमध्ये दीर्घकाळ वाद सुरू होता. ३ फेब्रुवारी रोजी पीडित तरुणी आणि तिची मैत्रीण आरोपीला सामोरे जाण्यासाठी गेल्या होत्या. आरोपी समोर न आल्याने त्याला मोठ्याने हाक मारत होत्या. दुसऱ्या दिवशी आरोपीने मैत्रिणीच्या स्नॅपचॅट अकाउंटवरून ‘ॲसिड अटॅक’ची धमकी दिली. या धमकीमुळे रागावलेल्या आरोपीने दुसऱ्या दिवशी हे हिंसक कृत्य केले, असा आरोप आहे.

पोलिस कारवाई

पीडित मॉडेलने ओशिवरा पोलीस ठाण्यात तक्रार दाखल केली आहे. त्यानुसार आरोपी मोहम्मद शकील शेख (वय २९) याच्याविरोधात भारतीय दंड संहिता अंतर्गत गुन्हा नोंदवला गेला आहे. पोलिसांनी घटनास्थळावरील सीसीटीव्ही फुटेज ताब्यात घेतले असून, सखोल तपास सुरू केला आहे. आरोपी अद्याप फरार असल्याचे सांगितले जात आहे. ही घटना मुंबईतील लोखंडवाला सारख्या हायप्रोफाईल परिसरात घडल्याने नागरिकांमध्ये भीतीचे वातावरण निर्माण झाले आहे. पोलिसांनी सर्व पैलूंवरून तपास करून लवकरात लवकर आरोपीला अटक करण्याचे आश्वासन दिले आहे.