जेट एअरवेजच्या 2000 कर्मचाऱ्यांना स्पाईसजेट नोकरी देणार

मुंबई : जेट एअरवेजच्या दोन हजार कर्मचाऱ्यांना स्पाईसजेट एअरलाईन्स कंपनी नोकरी देणार, अशी घोषणा कंपनीचे चेअरमन अजय सिंह यांनी केली. सध्या जेटएअरवेज कंपनी आर्थिक परिस्थितीमुळे बंद पडली आहे. यामुळे हजारो कर्मचाऱ्यांच्या नोकरीवर संकट आलं आहे. या कर्माचाऱ्यांना आधार देण्यासाठी स्पाईसजेट कंपनीने हा निर्णय घेतला आहे.

स्पाईसजेटने जेट एअरवेजच्या 22 विमानांनाही आपल्या ताफ्यात सामील करुन घेतलं आहे. आर्थिक संकटात अडकलेली जेट एअरवेज कंपनी आता पूर्णपणे बंद पडली आहे. कंपनीने कर्मचाऱ्यांचे काही महिन्यांचे पगारही दिलेले नाहीत.

“आम्ही जेट एअरवेजच्या कर्मचाऱ्यांना आमच्या कंपनीत घेणार आहोत. त्यांच्यात क्षमता आहे आणि ते मेहनतीही आहेत. यापुढेही आम्ही जेट एअरवेजच्या कर्मचाऱ्यांना नोकरी देण्याच्या प्रयत्नात असू”, असे अजय सिंह म्हणाले.

“आम्ही जेट एअरवेजच्या 1100 कर्मचाऱ्यांना आमच्या कंपनीत घेतलं आहे. अपेक्षा आहे की हा आकडा 2 हजार पर्यंत जाईल. यामध्ये पायलट, चालकांचा समावेश असेल. तसेच विमानतळावरील सुरक्षा रक्षकांचाही यामध्ये समावेश असेल”, असेही अजय सिंह यांनी स्पष्ट केलं.

सध्या स्पाईसजेटच्या कर्मचाऱ्यांची संख्या 14 हजार आहे आणि त्यांच्या ताफ्यात 100 विमानं आहेत. 100 विमान असलेल्या कंपनीच्या यादीत एअर इंडिया, जेट एअरवेज (आता बंद पडलेली कंपनी) आणि इंडिगोनंतर चौथी कंपनी स्पाईसजेट आहे.

स्पाईसजेटजवळ बोइंग 737, बॉम्बार्डिअर क्यू 400 आणि बी 737 फ्रायटर विमानं आहेत. स्पाईसजेट दिवसाला 575 विमानांचं उड्डाण करते. यामध्ये 9 आंतरराष्ट्रीय प्रवासी विमानांचाही समावेश आहे.