Anil Dhanorkar: महिलांचा संताप, प्रकरण तापताच प्रचारासाठी आलेल्या भाजप उमेदवाराचा काढता पाय, Viral Video पाहिला का?

Anil Dhanorkar Viral Video: गेल्या १५ वर्षात भद्रावती नगरपालिकेचे राजकारण करणारे माजी नगराध्यक्ष अनिल धानोरकर यांना जनतेने चांगलेच खडे बोल सुनावले. धानोरकर हे भद्रावती नगरपालिकेच्या अध्यक्षपदाची निवडणूक लढवत असून, भाजपचे ते उमेदवार आहेत. खासदार प्रतिभा धानोरकर यांचे ते भासरे आहेत.धानोरकरांना नागरिकांनी परत पाठवल्याचा व्हीडिओ चांगलाच व्हायरल होत आहे. वार्डातील भौतिक समस्या, घरकुल योजना व दारू या विषयावर नागरिकांनी धानोरकर यांना महिलांनी जाब विचारला. याविषयीचा व्हिडिओ व्हायरल झाला आहे.

महिलांच्या तीव्र रोषाचा सामना

भद्रावती नगरपरिषद निवडणुकीसाठी जोरदार प्रचार सुरू आहे. भाजपचे उमेदवार अनिल धानोरकर हे गवराळा गावात प्रचारासाठी आले. त्यावेळी दारू दुकानावरून स्थानिक महिलांनी त्यांना जाब विचारला. शहरासह परिसरात दारुच्या दुकानांमुळे संसार उद्धवस्त होत असल्याचे आणि कुटुंब व्यवस्थेवर परिणाम होत असल्याचा पाढा महिलांनी त्यांच्यासमोर वाचला. रात्री अनिल धानोरकर प्रचारासाठी आले होते. त्यावेळी काही महिलांनी त्यांना या दारु दुकानावरून जाब विचारला. महिलांच्या तीव्र रोषाचा त्यांना सामना करावा लागला. प्रश्नांची उत्तरे देऊ न शकल्याने त्यांना काढता पाय घ्यावा लागला. निवडणूक रंगात आली असतानाच भाजप उमेदवाराला नागरिकांनी असे पिटाळून लावल्याने स्थानिक मुद्दे किती गंभीर स्वरूपाचे आहेत, हे दिसून आले.

तुम्हीच मालक मग तक्रार कोणाकडे करायची?

दारु दुकानामुळे आमच्या घरातील आणि समाजातील तरुण बिघडत आहेत. तुम्हीच मालक असताना आम्ही कोणाकडे तक्रार करायची असा सवाल या महिलांनी धानोरकर यांना विचारला. या परिसरात धानोरकर यांचे दारुचे दुकान असल्याचा आरोप होत आहे. अचानक घडलेल्या या प्रकारामुळे धानोरकर चांगलेच अडचणीत आले. परिस्थिती हाताबाहेर जात असल्याचे लक्षात येताच त्यांनी काढता पाय घेतला.

व्हिडिओ झाला व्हायरल

चाळीस वर्षांपूर्वी लग्न करून या गावात आले. तेव्हापासून जसा वॉर्ड होता, आजही तो तसाच आहे. वॉर्डात कोणत्याच सुधारणा, विकास कामे झालेली नाही. मागील 15 वर्षात रस्ते आणि गट्टू बसवण्यात आले नाही. नाल्या, गटारी तुंबल्या आहेत, असा आरोप महिलांनी केला. याविषयीचा व्हिडिओ सोशल मीडियावर चांगला व्हायरल झाला आहे.