ओम साई! दहा रुपयाचा चहा प्यायला गेला, तीन हजाराची पावती फाडली!

नांदेड : सध्या आषाढधारांमुळे बहुतांश महाराष्ट्र ओलाचिंब झाला आहे. नांदेडमध्येही रिमझिम पाऊस सुरू आहे. पावसाच्या या वातावरणात ताजतवाना होण्यासाठी हमखास घ्यावेसे वाटणारे पेय म्हणजे वाफाळलेला चहा…! अमृततुल्य असं चहाला संबोधणाऱ्या एका कंपनीने चहाचे 1 दुकान नांदेडमध्ये नुकतंच सुरू झालं आहे. त्याच दुकानावर चहा घेण्यासाठी गेलेल्या युवकाला एक चहा तीन हजार दहा रुपयांना पडला.

त्याचं झालं असं की आषाढधारांमुळे ‘सादळ’ झालेल्या एका युवकाला चहा घ्यावासा वाटला. त्यासाठी तो एका चहाच्या नवीनच उघडलेल्या दुकानात शिरला. त्याने मस्तपैकी दहा रुपये किंमतीचा गरमागरम चहा घेतला. त्यानंतर हा युवक पुन्हा आपल्या बाईकजवळ आला. त्यावेळी पाहतो तर काय त्याच्या बाईकला वाहतूक पोलिसांनी पकडून ठेवलं होतं.

त्या युवकाने जायचं आहे असं म्हणताच पोलिसांनी त्याच्याकडे वाहन परवाना, गाडीचे कागदपत्र दाखवण्यास सांगितले. पण या चहा शौकिनाजवळ यातील काहीच नव्हतं. इतकंच काय तर त्याने आपल्या बाईकच्या नंबरवर कलाकारी करून ओमसाई असं लिहिलं होतं. त्यामुळे त्याच्या गाडीच्या नंबरचाही बोध होत नव्हता.

चहा घेण्यासाठी आलेल्या या युवकाने केलेल्या सर्व चुकांसाठी वाहतूक शाखेने दंड लावण्याचं ठरवलं आणि त्याचं एकूण बिल झालं थेट तीन हजार रुपये. युवकाने थोडा विरोध केला पण आपली चूक लक्षात आल्याचे पाहून त्याने वाहतूक शाखेकडे तीन हजार रुपयांचा दंड भरला. हा दंड भरल्यावर चाय से किटली गरम या म्हणीचा त्या युवकाला पुरता अर्थबोध झाला असावा.

तीन हजार दहा रुपयाला पडलेला हा चहा तो युवक कदापी विसरू शकणार नाही. कारण अगदी फाईव्ह स्टार किंवा सेव्हन स्टार हॉटेलातही एका चहाची किंमत नक्कीच इतकी नसते. त्यामुळे वाहतुकीचे नियम मोडून, नंबरप्लेट चुकीच्या पद्धतीने लावणे, शिवाय रस्त्यावर गाडी पार्क करणं तुम्हालाही महागात पडू शकतं.