हिंदू मुलींना जाळ्यात अडकवून लग्न करा..; टीसीएस नाशिक धर्मांतर प्रकरणात साक्षीदारांचे धक्कादायक खुलासे

माहिती तंत्रज्ञान क्षेत्रातील आघाडीच्या टाटा कन्सल्टन्सी सर्व्हिसेस (टीसीएस) या कंपनीच्या नाशिक केंद्रात कर्मचाऱ्यांच्या लैंगिक छळाचे प्रकार समोर आले आहेत. या प्रकरणी पोलिसांकडून कारवाई सुरू असून कंपनीनेही अंतर्गत चौकशी समिती स्थापन केली आहे. कंपनीमध्ये आर्थिक वर्ष 2020-21 आणि 2024-25 या पाच वर्षांच्या काळात लैंगिक छळाच्या तक्रारीत पाच पट वाढ झाल्याचं समोर आलं आहे. कंपनीने आपल्या वार्षिक अहवालातच ही माहिती दिलेली आहे. टीसीएस कंपनीत चार वर्षात महिलांवर अन्याय, अत्याचार, धर्मांतराचा प्रयत्न, मांसाहार करायला भाग पाडणं, विशिष्ट प्रार्थना, उपवास करायला लावणं असे प्रकार घडले. याप्रकरणी आठ जणांविरुद्ध एकूण नऊ गुन्हे दाखल आहेत. तर पोलीस कोठडीची मुदत संपल्याने ऑपरेशन विभागाच्या प्रमुख अश्विनी चैनानी यांना बुधवारी न्यायालयात हजर केलं असता 14 दिवसांची न्यायालयीन कोठडी सुनावण्यात आली. या गुन्ह्यात कारागृहात असणाऱ्या दोन संशयितांनी जामिनासाठी अर्ज केले आहेत.

टीसीएसच्या नाशिक कार्यालयात कथित लैंगिक छळ आणि धर्मांतराच्या सुरू असलेल्या तपासात एक नवीन दावा समोर आला आहे. काही आरोपींनी इतरांना हिंदू मुलींशी लग्न करण्यासाठी प्रवृत्त केल्याचा आरोप एका साक्षीदाराने केला आहे. नाशिक युनिटमधील महिला कर्मचाऱ्यांनी दाखल केलेल्या तक्रारींची चौकशी करणारे अधिकारी ज्या साक्षीची तपासणी करत आहेत. त्याचाच हा एक भाग आहे. नाशिक कार्यालयातील एका कंत्राटी कर्मचाऱ्यांनी सांगितलं की, “ते म्हणायचे जा आणि हिंदू मुलींना जाळ्यात ओढा. त्यांना तुमच्या गर्लफ्रेंड बनवा आणि त्यांच्याशी लग्न करा. ते म्हणायचे तुमचा धर्म बदला. त्यासाठी त्यांना पैसेही दिले जात होते. टीसीएसच्या एचआर मॅडम निदा खान यांनाही पैसे दिले जात होते.”

टीसीएसमध्ये सहा वर्षे काम करणाऱ्या एका तरुणीने तिचा अनुभव सांगितला आहे. नाशिक कार्यालयात बदली करण्यात आल्यानंतर तिला मुख्य इमारतीपासून वेगळ्या टेरेसवर एकटीने काम करण्यास सांगितलं गेलं. एनडीटीव्हीशी बोलताना ती म्हणाली, “मला छतावर एकटीने काम करण्यास सांगितलं. माझा फोन, बॅग जप्त करण्यात आले. जेव्हा मी वॉशरुमसाठी किंवा इतर कोणत्याही कारणासाठी खाली यायचे, तेव्हा सुरक्षा किंवा इतर कोणत्या तरी नावाखाली माझा मोबाईल फोन, बॅग आणि माझ्या सर्व वैयक्तिक वस्तू जप्त केल्या जात असत. कंपनीत काम करणाऱ्या अनेक तरुण कर्मचाऱ्यांचं शोषण केलं जात होतं आणि त्यांचं ब्रेनवॉशिंग केलं जात होतं. 20 ते 25 वयोगटातील तरुणींना ते सहज लक्ष्य मानायचे. त्यांना जाळ्यात अडकवणं सोपं जाईल असं, त्यांना वाटत होतं.”

याप्रकरणी अटक करण्यात आलेल्या आरोपींची नावं दानिश शेख, तौसीफ अत्तार, रजा मेमन, शाहरुख कुरेशी, शफी शेख, आसिफ आफताब अन्सारी आणि एचआर मॅनेजर निदा खान अशी आहेत. कार्यालयाच्या वातावरणात एखादी संघटित पद्धत किंवा बळजबरीने जाळं कार्यरत होतं का याचा तपास अधिकारी करत आहेत. अधिकाऱ्यांनी सांगितलं की, एक विशेष तपास पथक या प्रकरणाच्या सर्व पैलूंची चौकशी करत आहे.