चर्चा तर होणारचः मंत्री भुजबळांचा नायक 2; स्वस्त धान्य दुकानावर धडक भेट देत झाडाझडती, काय घडले बघाच…!
मंत्री छगन भुजबळांनी मुळशी दौऱ्यात आपली गाडी अचानकपणे चाले या गावातील स्वस्त धान्य दुकानाकडे वळवायला लावली. यावेळी त्यांनी आयएसओ नामांकन आवश्यक असलेल्या अटी व नियमांनुसार रेशन दुकानातील वजनमापे काटा, धान्यवाटप प्रमाणपत्र फलक, दरपत्रक फलक, जिल्हा दक्षता कमिटी बोर्डसह इतर सर्व बाबींची पूर्तता करण्यात आलेली आहे की नाही याची प्रत्यक्ष पाहणी केली. भुजबळांच्या या धावत्या भेटीची पंचक्रोशीत चांगलीच चर्चा रंगली.
नाशिकः तुम्ही अनिल कपूरचा (Anil Kapoor) नायक सिनेमा पाहिला असेलच. या चित्रपटातील मुख्य भूमिका करणारा नायक अनिल कपूर एक दिवसाचा मुख्यमंत्री होतो. अन् तो अचानक एका स्वस्त धान्य दुकानावर धडक देत पाहणी करतो. असाच काहीसा प्रकार रविवारी पुणे जिल्ह्यात घडला. राज्याचे अन्न, नागरी पुरवठा व ग्राहक संरक्षण मंत्री छगन भुजबळ (Chhagan Bhujbal) हे आज मुळशी येथील दौऱ्यावर असताना त्यांनी येथील चाले या गावातील परवानाधारक धनजंय दाभाडे यांच्या स्वस्त धान्य दुकानास अचानकपणे भेट दिली. यावेळी शासनाने आयएसओ (ISO) नामांकन प्राप्त करण्यासाठी ठरवून दिलेल्या सर्व अटी व नियमांचे पालन केले जाते की नाही याबाबत पाहणी केली. भुजबळांच्या या डायरेक्ट भेटीने दुकानदाराचे धाबे दणाणले. मंत्री महोदयांचा ताफा दुकानासमोर थांबल्याने परिसरातील गावकऱ्यांनी या ठिकाणी मोठी गर्दी केली.
त्याचे झाले असे की…
मंत्री छगन भुजबळांनी मुळशी दौऱ्यात आपली गाडी अचानकपणे चाले या गावातील स्वस्त धान्य दुकानाकडे वळवायला लावली. यावेळी त्यांनी आयएसओ नामांकन आवश्यक असलेल्या अटी व नियमांनुसार रेशन दुकानातील वजनमापे काटा, धान्यवाटप प्रमाणपत्र फलक, दरपत्रक फलक, जिल्हा दक्षता कमिटी बोर्ड, तालुका दक्षता कमिटी बोर्ड, परवाना फलक, अग्निशामक यंत्र, प्रथमोपचार कीट, व्हिजिट बुक, तक्रार पुस्तिका, ऑनलाईन विक्री रजिस्टर या सर्व बाबींची पूर्तता करण्यात आलेली आहे की नाही याची प्रत्यक्ष पाहणी केली.
प्रामाणिकपणाचे केले कौतुक
मंत्री भुजबळ यांना या प्रत्यक्ष पाहणी दरम्यान स्वस्त धान्य दुकानदाराकडून आयएसओ नामांकन प्राप्त करण्यासाठी आवश्यक अटी व नियमांची पूर्तता करण्यात आल्याचे आढळून आले. त्यामुळे त्यांनी या रेशन दुकानास आयएसओ प्रमाणपत्र देण्यात यावे, अशा सूचना करत रेशन दुकानदार प्रामाणिकपणे सेवा करत असल्याबद्दल कौतुक केले. आपले काम सुरू ठेवावे, अशा सूचना दुकानदारास त्यांनी केल्या. भुजबळांच्या या धावत्या भेटीची पंचक्रोशीत चांगलीच चर्चा रंगली.
वारकऱ्यांचे केले अभिष्टचिंतन
भुजबळांनी मुळशी तालुक्यातील वारकरी संस्थेच्या कार्यक्रमाला हजेरी लावली. वारकरी संप्रदाय समाज तालुका मुळशी या संस्थेचा हिरकमहोत्सव व ज्येष्ठ वारकऱ्यांचा अमृत महोत्सवी अभिष्टचिंतन सोहळा त्यांच्या उपस्थितीत पार पडला. संत ज्ञानेश्वर महाराजांनी मूळ बुद्धिप्रामाण्यवादी भारतीय तत्त्वज्ञानाचा प्रसार – प्रचार अधिक व्यापक स्वरूपात केला. आपल्या ज्ञानेश्वरी, चांगदेव पासष्ठी, हरिपाठ, अभंग, विरहीन्या इत्यादी चिंतनशील रचनांमधून व प्रत्यक्ष आचरणातून त्यांना लोकांच्या मनात विवेकाची ज्योत जागृत केली. पसायदानाच्या रूपाने दया, क्षमा, करुणा, प्रेम आणि समतेचा संदेश त्यांनी महाराष्ट्रातील घराघरांत पोचवला. भारतीय परंपरेतील विविध विचारधारा, जाती, वर्ण, पंथ आणि सांप्रदाय एकत्रित आणून “हे विश्वची माझे घर’ हा नवा वैश्विक विचार जगापुढे मांडला. धर्माच्या आणि प्रांतांच्याही सीमा या विचारांनी मोडून काढल्याचे ते म्हणाले.
इतर बातम्याः
