Photo Gallery: इगतपुरीमध्ये 2 एकर ऊस जळून खाक; शेतकऱ्याच्या काळजाचे पाणी-पाणी!
इगतपुरी तालुक्यातल्या धामणगाव येथे परशुराम गाढवे यांच्या शेतात लागलेल्या आगीमुळे तब्बल 2 एकर ऊस जळून खाक झाला. शेतातील विद्युत तारांच्या शॉर्टसर्किटमुळे ही आग लागल्याचे समजते.
आगीमध्ये तोडीस आलेला दोन एकर ऊस जळून खाक झाला. ही आग आटोक्यात आणण्यासाठी शर्थीचे प्रयत्न करण्यात आले. मात्र, शेतकऱ्यांना यश आले नाही.
तालुक्यात यापूर्वी गेल्याच महिन्यात रामकृष्ण गाढवे व काशीनाथ गाढवे यांच्या शेतात विजेच्या तारांचे शॉर्टसर्किट झाल्यामुळे पाच एकर ऊस जळून खाक झाला आहे.
परशुराम गाढवे यांच्या गट नंबर 632 व 33 मध्ये आग लागली. शेतकरी गाढवे यांनी घरातील सामान लगबगीने बाहेर काढले. जनावरांच्या गोठ्यातील जनावरे चपळाईने सोडून त्यांचा जीव वाचवला.
गाढवे यांच्या शेतातील घरात गॅस सिलिंडर होते. मात्र, ते बाहेर काढले. अन्यथा अनर्थ घडला असता. वीज वितरणचे सहाय्यक अभियंता धोरणकर यांनी कर्मचाऱ्यांसह घटनास्थळी धाव घेत घटनेची पाहणी करून पंचनामा केला.
गेल्या वर्षी देखील गाढवे यांच्या शेतातील ऊस जळाल्याची घटना घडली होती. त्यावेळी परिसरात दोन वेळा विजेच्या शॉर्टसर्किटमुळे लागलेल्या आगीत दहा एकर ऊस जळून भस्मसात झाला होता.
