Nashik | सटाणा न्यायालयाला नवीन इमारत मिळणार; 10 कोटी 37 लाखांचा निधी मंजूर, काय असतील सोयी-सुविधा?
नाशिक जिल्ह्यातील सटाणा येथे नवीन विस्तारित न्यायालयीन इमारतीचे बांधकाम करण्यासाठी सार्वजनिक बांधकाम विभागाच्या माध्यमातून मा. उच्च न्यायालय यांच्याकडून शासनास प्रस्ताव सादर करण्यात आला होता. या प्रस्तावास मान्यता मिळण्यासाठी मंत्री छगन भुजबळ यांनी पाठपुरावा केला आणि त्याला अखेर मंजुरी मिळाली आहे.
नाशिकः नाशिक जिल्ह्यातील सटाणा (Satana) न्यायालय (Court) आता कात टाकणार आहे. या न्यायालयाच्या नूतन इमारतीचे काम लवकरच सुरू होणार असून, त्यासाठी तब्बल 10 कोटी 37 लाख रुपयांचा निधी राज्याचे अन्न, नागरी पुरवठा व ग्राहक संरक्षण मंत्री तथा नाशिक जिल्ह्याचे पालकमंत्री छगन भुजबळ (Chhagan Bhujbal) यांच्या विशेष प्रयत्नांतून निधी मंजूर करण्यात आला आहे. याबाबतचा शासन निर्णय प्रकाशित करण्यात आला असून, लवकरच या कामाला सुरुवात होणार आहे. सटाणा न्यायालयाची इमारत अतिशय जुनी झाल्याने आणि कामकाज करण्यात जागा कमी पडत असल्याने सटाणा बार असोसिएशनचे अध्यक्ष अॅड. पंडित भदाणे, अॅड. रवींद्र पगार व नाशिक बार असोसिएशनचे सचिव अॅड. जालिंदर ताडगे यांनी सटाणा न्यायालय विस्तारित इमारतीच्या बांधकामासाठी निधी द्यावा, अशी मागणी पालकमंत्री छगन भुजबळ यांच्याकडे मागणी केली होती.
अन् अखेर प्रश्न मार्गी
मंत्री छगन भुजबळ यांनी सार्वजनिक बांधकाम विभागाला सटाणा न्यायालय इमारतीच्या बांधकामाबाबत प्रस्ताव सादर करण्याचे आदेश दिले होते. या प्रस्तावास शासनाची मंजुरी मिळाली असून इमारतीच्या बांधकामाचा प्रश्न अखेर मार्गी लागला आहे. सटाणा येथे नवीन विस्तारित न्यायालयीन इमारतीचे बांधकाम करण्यासाठी सार्वजनिक बांधकाम विभागाच्या माध्यमातून मा. उच्च न्यायालय यांच्याकडून शासनास प्रस्ताव सादर करण्यात आला होता. या प्रस्तावास मान्यता मिळण्यासाठी मंत्री छगन भुजबळ यांनी पाठपुरावा केला आणि त्याला अखेर मंजुरी मिळाली आहे.
कशी असेल नवीन इमारत?
सटाणा न्यायालयाच्या नूतन इमारतीच्या बांधकामास मंजुरी मिळाली असून, यासाठी दहा कोटी सदोतीस लाख रुपयांचा निधी मंजूर करण्यात आला आहे. या माध्यमातून या नूतन इमारतीत दोन मजली वाहनतळ, गॅस पाइप, बायो डायजेस्टर, रेन वॉटर हार्वेस्टिंग, सोलर रुफ टॉप, दिव्यांगांसाठी रॅम्प, फर्निचर, पाणीपुरवठा, विद्युतीकरण, अग्निशमन यंत्रणा,आवरभिंत व गेट, अंतर्गत रस्ते, मैदानाचा विकास, वाहनतळ, अंडरग्राउंड पाण्याची टाकी, पंप हाऊस, वातानुकूलित यंत्रणा, सीसीटीव्ही यंत्रणा विकसित करण्यात येणार आहे. दरम्यान, लवकरच या नव्या इमारतीचे बांधकाम सुरू आहे. त्याचे जिल्ह्यातील वकिलांनी स्वागत केले आहे.
