श्रीवर्धन आमचा अभेद्य बालेकिल्ला! महेंद्र दळवींच्या टीकेवर सुनील तटकरेंचं सूचक उत्तर

राष्ट्रवादी काँग्रेसचे ज्येष्ठ नेते सुनील तटकरे यांनी श्रीवर्धन विधानसभा मतदारसंघ आजही आणि उद्याही पक्षाचा अभेद्य बालेकिल्ला राहील, असा ठाम विश्वास व्यक्त केला. महायुतीमधील काही नेत्यांकडून होणाऱ्या टीकेला त्यांनी विशेष महत्त्व न देता, रायगड जिल्ह्याच्या विकासासाठी आपले कार्य अव्याहतपणे सुरू ठेवणार असल्याचे सांगितले. महेंद्र दळवी यांनी केलेल्या टीकेसंदर्भात विचारले असता, तटकरे यांनी त्यांना क्षमा करा अशी प्रतिक्रिया दिली.

वरिष्ठ पातळीवरील टीका टिप्पणीला फारसे गांभीर्याने न घेता, पांडुरंगाने त्यांना क्षमा करावी असेही ते म्हणाले. दळवींच्या तटकरे कुटुंबाला विरोध, राष्ट्रवादीला नाही या वक्तव्यावर त्यांनी कोणाला काय विरोध असला तरी असू द्या असे उत्तर दिले. गेली 40 वर्षांपासून या जिल्ह्यात समर्पित भावनेने काम करत असल्याचे सांगत, रायगडचा सर्वांगीण विकास हेच आपले उद्दिष्ट असल्याचे तटकरेंनी स्पष्ट केले. मतदारसंघातील जनता सुज्ञ असून, कोणताही मतदार कुणी गृहीत धरू नये, असा सल्लाही त्यांनी दिला.