विद्यानंद बापट यांच्यावर कोणी हल्ला केला? पुणे पोलिसांची पहिली प्रतिक्रिया समोर

पुण्यात डीजे बंदीच्या मागणीवरून दोन गट पडले आहेत. गणेश मंडळातील तरुणांकडून डीजे सुरू राहावा, अशी मागणी केली जात आहे. तर विद्यानंद बापट यांच्यासहित इतर पुणेकरांकडून डीजेला विरोध केला जात आहे. यावरून पुण्यात चांगलाच वाद पेटला आहे. अशातच डीजेच्या विरोधात आवाज उचलणाऱ्या विद्यानंद बापट यांना मारहाण झाल्याची घटना घडली आहे. बापट हे टीव्ही9 शी बोलत असताना त्यांच्यावर हल्ला झाला. या प्रकरणावर पुणे पोलिसांची प्रतिक्रिया समोर आली आहे .

विद्यानंद बापट यांच्यावर पुण्यातील एका तरुणाने हल्ला केला. मला आधी त्याच्या दोन वाजवू द्या, पुणेकरांबद्दल तुला कोणी…असं म्हणत बापट यांच्यावर हल्ला केला. बापट यांच्यावर हल्ला झाल्यानंतर राजकीय वातावरण तापलं आहे. या घटनेवर पुणे पोलिसांनी प्रतिक्रिया देत कारवाई करणार असल्याचे स्पष्ट केले. पुणे पोलीस म्हणाले, ‘आरोपीने मारहाण का केली, याची माहिती घेणार. व्हिडिओमध्ये एक तरुण मारहाण करताना दिसत आहे. या घटनेची माहिती घेऊन कारवाई केली जाईल’. बापट यांना मारहाण झाल्यानंतर पोलिसांनी सुरक्षितरित्या विद्यानंद बापट यांना वाहनातून पोलीस स्टेशनला नेले. तर विद्यानंद बापट यांना मारहाण करणाऱ्या तरुणाचे नाव संतोष चव्हाण असल्याची माहिती हाती आली आहे.  संतोष चव्हाण हा फरार असून पोलिसांकडून शोध सुरू आहे. संतोष हा प्रियदर्शनी गणेश मंडळाचा माजी अध्यक्ष आहे.

तत्पूर्वी, विद्यानंद बापट यांच्यावर हल्ला झाल्यानंतर राजकीय वातावरण तापलं आहे. बापट यांच्या हल्ल्याचा सत्ताधाऱ्यांसह विरोधी पक्षाच्या नेत्यांकडून निषेध नोंदवला जात आहे. या हल्ल्यानंतर राष्ट्रवादीचे पदाधिकारी बापट यांच्यासाठी धावून आल्या आहेत. पोलीस स्टेशनला पोहोचून राष्ट्रवादी काँग्रेसच्या पदाधिकाऱ्यांनी विद्यानंद बापट यांच्या भूमिकेचं समर्थन केलं. राष्ट्रवादीच्या पदाधिकारी म्हणाल्या, विद्यानंद बापट हे सातत्याने एक मुद्दा मांडत आहे. तो मुद्दा अनेकांना पटणारा नाही. परंतु कायदा हातात घेणे चुकीचे आहे. त्यांचा मारहाणीचा निषेध करतो. मारहाणीनंतर सुप्रिया सुळे यांनी बापट यांच्याशी संवाद साधलाय. त्यांची माहिती घेत आहेत. त्यांना सर्वपरीने मदत करू. खरंतर ही भाजपची गुंडशाही सुरू आहे. त्यांचे शहाराध्यक्ष त्यांना कुत्रही विचारत नसल्याचे बोलतात’.