Pune Crime News | पुणे शहरात धक्कादायक घटना, माजी नगरसेविकेवर अत्याचार

पुणे | 5 ऑक्टोंबर 2023 : पुणे शहरात गुन्हेगारी वाढली असताना अत्याचाराची एक घटना समोर आली आहे. हा अत्याचार एका माजी नगरसेविकेवर तिच्या मित्रानेच केला आहे. या प्रकरणी नगरसेविकेने पोलिसांत फिर्याद दिल्यानंतर गुन्हा दाखल झाला आहे. तसेच पोलिसांनी आरोपीला अटक केली आहे. मित्र असलेल्या या आरोपीने धमक्या देत पैसेही घेतल्याचा आरोप माजी नगरसेविकेने पोलिसात दिलेल्या तक्रारीत केला आहे. पर्वती पोलीस या प्रकरणाचा तपास करत आहे.

काय आहे प्रकरण

पुणे येथील माजी नगरसेविका असलेल्या महिलेची सचिन मच्छिंद्र काकडे ( वय ४३, रा. संतोषनगर, कात्रज) याच्याशी मैत्री होती. त्या मैत्री संबंधातून काढलेले फोटो व्हायरल करण्याची धमकी सचिन काकडे याने देऊन माजी नगरसेविकेवर अत्याचार केला. 2017 पासून आरोपी काकडे याने धमकी देत सातत्याने अत्याचार केला. यामुळे त्या नगरसेविकेने अखेर पर्वती पोलिसांत सचिन काकडे विरोधात गुन्हा दाखल केला.

पैशांची सातत्याने मागणी

आरोपी सचिन काकडे आणि पीडित नगरसेविका हे अनेक वर्षांपासून मित्र होते. त्या महिलेच्या पतीला मैत्री संबंध बाबतची माहिती देईल. तसेच यासंदर्भातील फोटो आणि ध्वनिफित समाज माध्यमात व्हायरल करण्याची धमकी सचिन याने दिली. त्यासाठी दहा लाख रुपयांची मागणी केली. दहा लाख रुपये दिल्यानंतर पुन्हा पैशांची मागणी सचिन याच्याकडून होत होती.

दोन दिवसांपूर्वी असा घडला प्रकार

सचिन काकडे हा दोन दिवसांपूर्वी त्या माजी नगरसेविका असलेल्या महिलेच्या घरी आला. तिला त्याने सांगितले की, तू दुसरे लग्न केले आहे. परंतु तुझ्यामुळे माझी पत्नी मला सोडून गेली. त्यानंतर त्याने तिला मारहाण केली. सचिन काकडे याच्या वारंवार होणाऱ्या त्रासाला कंटाळून महिलेने पर्वती पोलीस ठाणे गाठले. पोलिसांनी गुन्हा दाखल केला असून आरोपीला अटक केली आहे. तपास पोलीस उपनिरीक्षक सचिन निकाळजे करत आहेत.