शिवसेना कुणाची? शिंदे गटाचा जोरदार युक्तिवाद, व्हीप आणि पक्षांतर्गत निवडणुकांवर उपस्थित केले सवाल

शिवसेना कुणाची, या बहुचर्चित प्रकरणात उपमुख्यमंत्री एकनाथ शिंदे गटाच्या वकिलांनी आपले युक्तिवाद सादर केले आहेत. वरिष्ठ वकील मनिंदर सिंग यांनी संघटनात्मक रचनेतील निवडणुकांचा मुद्दा उपस्थित केला. जर संघटनेत निवडणुका होत नसतील, तर त्या आधारावर पक्ष कोणाचा हे ठरवणे योग्य आहे का, असा सवाल त्यांनी केला. तसेच, निर्देशन पद्धत (nomination method) वापरून पक्षप्रमुखाची निवड करण्याच्या पद्धतीवरही त्यांनी प्रश्नचिन्ह निर्माण केले. २०१८ मध्ये शिवसेनेच्या घटनादुरुस्तीनंतर पक्षांतर्गत नेमणुका निवडणुकांविना झाल्याचा युक्तिवाद त्यांनी केला. पक्षावर बहुमत कोणाकडे आहे, हे संख्याबळावर ठरते, असेही त्यांनी नमूद केले.

मनिंदर सिंग यांचा युक्तिवाद संपल्यानंतर शिंदे गटाचे दुसरे वकील ध्रुव मेहता यांनी आमदार अपात्रता प्रकरणावर युक्तिवाद केला. एकनाथ शिंदे विधिमंडळ पक्षाचे नेते होते आणि २१ जून रोजी झालेल्या आमदारांच्या बैठकीत भरत गोगावले यांना व्हीप म्हणून निवडण्यात आले होते, असे मेहता यांनी सांगितले. गोगावलेंनीच काढलेला व्हीप आमदारांनी मानला, असा युक्तिवाद त्यांनी केला, तसेच मूळ याचिकेतील आरोप निराधार असल्याचे म्हटले.