Salman Khan : सलमान खानला सापानं केला दंश; पनवेलच्या फार्महाऊसमधली घटना
अभिनेता सलमान खान(Salman Khan)ला सापानं दंश केलाय. पनवेलच्या फार्महाऊसमधली ही खळबळजनक घटना आहे. यानंतर त्याला रात्री 3 .30 वाजता हॉस्पिटलमध्ये दाखल करण्यात आलं होतं.
सूरज मसुरकर, टीव्ही9 मराठी, मुंबई : अभिनेता सलमान खान(Salman Khan)ला सापा(Snake)नं दंश केलाय. पनवेलच्या फार्महाऊस(Panvel FarmHouse)मधली ही खळबळजनक घटना आहे. यानंतर त्याला रात्री 3 .30 वाजता हॉस्पिटलमध्ये दाखल करण्यात आलं होतं. MGM हॉस्पिटलमध्ये तो दाखल होता. दरम्यान आता त्याला घरी सोडण्यात आलंय.
ख्रिसमस आणि बर्थडे सेलिब्रेशन
ख्रिसमस तसंच वाढदिवसानिमित्त सलमान खान त्याच्या कुटुंबीय आणि मित्रांसह पनवेल इथल्या फार्महाऊसला काल आला होता. मध्यरात्री बाहेर पडल्यानंतर हा प्रकार घडला. सुदैवाने साप बिनविषारी होता, त्यामुळे मोठं संकट टळलं. या प्रकारानंतर त्याला तातडीनं रुग्णालयात दाखल करण्यात आलं. उपचारानंतर सकाळी त्याला डिस्चार्ज देण्यात आला. आता त्याची प्रकृती ठीक असल्याचं समजतंय.दरम्यान, सलमान खान 56 वर्षांचा होणार आहे. 27 डिसेंबर रोजी तो आपला 56वा वाढदिवस साजरा करणार आहे. कोरोनामुळे सलमान यावेळी फार जोरात वाढदिवस साजरा करणार नाहीये. एका रिपोर्टनुसार, यावेळी सलमानच्या वाढदिवसानिमित्त एक छोटीशी पार्टी होणार आहे.
कोरोनामुळे साधेपणानं साजरा करणार वाढदिवस
सलमान खान त्याचा वाढदिवस पनवेलच्या फार्महाऊसवर साजरा करणार आहे. कुटुंबातील सदस्य आणि काही खास मित्र या पार्टीत सहभागी होणार आहेत. सलमानचा प्लॅन असा आहे, की तो खूप लोकांना आमंत्रित करणार नाही. तसं प्रत्येक वेळी सलमान खानच्या वाढदिवसाला पाहुण्यांची यादी खूप मोठी असते. मात्र गेल्या दोन वर्षांपासून कोरोनामुळे सलमान आपला वाढदिवस साधेपणानं साजरा करतोय.
टायगर 3चं शेड्यूल
सलमान खानचा नुकताच अंतिम हा सिनेमा रिलीज झाला होता. या चित्रपटात त्याच्यासोबत आयुष शर्मा मुख्य भूमिकेत दिसला होता. हा चित्रपट 26 नोव्हेंबर रोजी थिएटरमध्ये प्रदर्शित झाला होता. आता टायगर 3च्या शूटिंगसाठी सलमान लवकरच 15 दिवसांच्या शेड्यूलसाठी निघणार आहे. टायगर 3च्या शेड्यूलसाठी सलमान कॅटरिना कैफसोबत निघणार आहे.
