Solapur : आंबेगावात कामगारांचं बचावकार्य सुरु असतानाच भाजप नेत्यांकडून श्रद्धांजलीच्या पोस्ट

सोलापूर जिल्ह्यातील पंढरपूर तालुक्यातील आंबेगावात एक धक्कादायक घटना घडली आहे. येथील एका विहिरीत काम करत असताना मातीचा ढिगारा कोसळल्याने चार कामगार आतमध्ये अडकले. गेल्या सात तासांपासून या कामगारांना वाचवण्यासाठी शर्थीचे प्रयत्न सुरू आहेत आणि बचावकार्य वेगाने सुरू आहे. मात्र, या गंभीर परिस्थितीत प्रशासनाकडून कामगारांच्या मृत्यूची कोणतीही अधिकृत घोषणा झालेली नसताना, काही भाजप नेत्यांनी सोशल मीडियावर कामगारांना श्रद्धांजली वाहणाऱ्या पोस्ट करून एक नवा वाद निर्माण केला आहे.

पालकमंत्री जयकुमार गोरे, माजी आमदार प्रशांत परिचारक, माऊली हळणवर आणि भाजप तालुका अध्यक्ष सुभाष मस्के यांच्यासह अन्य नेत्यांनी या कामगारांना श्रद्धांजली वाहिली. प्रशासनाच्या अधिकृत घोषणेपूर्वीच श्रद्धांजली वाहिल्यामुळे अनेक प्रश्न उपस्थित झाले आहेत. पालकमंत्री जयकुमार गोरे यांनी नंतर आपली पोस्ट तात्काळ डिलीट केली असली तरी, हा प्रकार समोर आल्याने राजकीय आणि सामाजिक वर्तुळात तीव्र प्रतिक्रिया उमटल्या आहेत. बचावकार्य अजूनही सुरू असताना, नेत्यांनी अशा प्रकारच्या पोस्ट करणे अयोग्य असल्याचे मत अनेकांनी व्यक्त केले आहे.