सातारा जिल्हा बँकेत नवा ट्विस्ट! रामराजेंनी उमेदवारी अर्ज मागे घेतला; आता शिवेंद्रसिंहराजे आणि मकरंद पाटलांची भूमिका निर्णायक?

सातारा जिल्हा मध्यवर्ती सहकारी बँकेच्या निवडणुकीत मोठी राजकीय घडामोड घडली आहे. बँकेचे माजी अध्यक्ष आणि ज्येष्ठ नेते रामराजे नाईक निंबाळकर यांनी कृषी प्रक्रिया आणि फलटण विकास सेवा सोसायटी या दोन्ही मतदारसंघांतील आपले उमेदवारी अर्ज मागे घेतले आहेत. त्यांच्या या माघारीमुळे जिल्ह्यातील सहकार क्षेत्रातील राजकीय समीकरणांची चर्चा पुन्हा सुरू झाली आहे. तर दुसरीकडे जिल्हा बँकेतील जागावाटपाचा तिढा अद्याप सुटलेला नसल्याने महायुतीतील मातब्बर नेत्यांसमोर मोठं आव्हान उभं राहिलं आहे.

जिल्हा बँकेच्या नियमांमधील दहा वर्षांच्या निकषामुळे संभाव्य अपात्रतेचा धोका लक्षात घेऊन रामराजे नाईक निंबाळकर यांनी उमेदवारी अर्ज मागे घेतल्याची चर्चा राजकीय वर्तुळात आहे. त्यांच्या निर्णयामुळे फलटणसह सातारा जिल्ह्याच्या सहकार राजकारणात पुढे कोणती समीकरणं तयार होणार, याकडे लक्ष लागलं आहे. सातारा जिल्हा बँकेच्या निवडणुकीत महायुतीतील घटक पक्षांमध्ये जागावाटपाचा प्रश्न अद्याप मार्गी लागलेला नाही.

घटस्थापनेला जागावाटप जाहीर होईल, अशी अपेक्षा व्यक्त केली जात होती. मात्र विजयादशमी उलटूनही जागावाटपाचा निर्णय होऊ शकलेला नाही. त्यामुळे इच्छुक उमेदवार आणि नेत्यांची प्रतीक्षा वाढली आहे. कोणाकडे किती ठराव आहेत. त्या संख्येनुसार कोणाला किती जागा द्यायच्या, या सूत्रावर महायुतीची चर्चा अडकली असल्याचे चित्र आहे. ठरावांची संख्या आणि स्थानिक राजकीय प्रभाव यांचा विचार करून जागावाटप करण्याचे आव्हान नेत्यांसमोर आहे. त्यामुळे जागांचे अंतिम गणित जुळवताना घटक पक्षांमध्ये समन्वय साधणे महत्त्वाचे ठरणार आहे.

सार्वजनिक बांधकाम मंत्री शिवेंद्रसिंहराजे भोसले आणि मदत व पुनर्वसनमंत्री मकरंद पाटील यांची भूमिका या निवडणुकीत कळीची ठरण्याची शक्यता आहे. दोन्ही नेत्यांमधील समन्वय आणि जागावाटपाबाबतची भूमिका महायुतीच्या पुढील रणनीतीसाठी महत्त्वाची ठरू शकते. रामराजे नाईक निंबाळकरांची माघार आणि जागावाटपाचा रखडलेला निर्णय या दोन घडामोडींमुळे सातारा जिल्हा बँकेची निवडणूक अधिक लक्षवेधी झाली आहे. आता महायुती जागावाटपाचा तिढा कसा सोडवते आणि उमेदवारीचे अंतिम चित्र कधी स्पष्ट होते, याकडे राजकीय वर्तुळाचे लक्ष लागले आहे.