शिंदे गटात मोठी उलथापालथ, सोलापुरातील अख्खी कार्यकारिणीच बरखास्त; तडकाफडकी निर्णय; काय घडतंय?

राज्याच्या राजकारणातून मोठी बातमी समोर आली. शिवसेनेचे मुख्य नेते एकनाथ शिंदे यांनी सोलापूर, माढा लोकसभेची जिल्हा कार्यकारिणी बरखास्त करण्याचे आदेश दिले आहे, त्यामुळे या दोन्ही लोकसभेतील सर्व निवडी रद्द करण्यात आल्या आहेत. यामुळे या दोन्ही मतदार संघात खळबळ उडाली आहे. काल खासदार श्रीकांत शिंदे यांनी या दोन्ही मतदारसंघात आढावा बैठक घेतली होती. त्यानंतर आज तडकाफडकी जिल्हा कार्यकारिणी बरखास्त करण्यात आली आहे. याबाबत सविस्तर माहिती जाणून घेऊयात.

शिवसेनेची कार्यकारिणी बरखास्त

शिवसेनेची सोलापूर, माढा लोकसभेची जिल्हा कार्यकारिणी बरखास्त करण्यात आली आहे. जिल्हा कार्यकारणी सोबतच महिला आघाडी, युवासेना आणि इतर प्रकोष्ट रद्द करण्यात आले आहे. त्यामुळे आता सोलापूर आणि माढा लोकसभेतील जिल्हाप्रमुख ते शाखाप्रमुखापर्यंतच्या सर्व निवडी रद्द झाल्या आहेत. शिवसेना मुख्य नेते एकनाथ शिंदे यांच्या आदेशानंतर ही कार्यकारणी बरखास्त करण्यात आली असल्याची माहिती समोर आली आहे.

आढावा बैठकीनंतर निर्णय

काल शिवसेनेचे खासदार श्रीकांत शिंदे यांनी सोलापुरात आढावा बैठक घेतली होती. या बैठकीमध्ये काही पदाधिकाऱ्यांनी गैरवर्तन केले होते, त्यामुळे श्रीकांत शिंदे संतापले देखील होते. त्यानंतर अखेर आज जिल्ह्यातील सर्वच कार्यकारणी बरखास्त करण्यात आली आहे. यामुळे आता आगामी काळात या दोन्ही मतदारसंघांना नवी कार्यकारिणी मिळण्याची शक्यता आहे. यामुळे या ठिकाणी आता शिवसेनेची धुरा नवीन पदाधिकाऱ्यांच्या खांद्यावर दिली जाण्याची शक्यता आहे.

श्रीकांत शिंदेंनी पदाधिकाऱ्यांच्या कामाबाबत घेतला होता आढावा

काल खासदार श्रीकांत शिंदे यांनी आढावा बैठक घेतली होती. याबाबत बोलताना श्रीकांत शिंदे यांनी, ‘सोलापूर, धाराशिव, माढा या लोकसभाचा आढाव आम्ही या बैठकीत घेत आहे. शिंदे साहेबांच्या आदेशाने संपर्क प्रमुख नेमण्यात आलेले आहेत, ते सर्व जबाबदारी पार पाडत आहेत. आम्ही लोकसभा निहाय आढावा घेतोय यानंतर अगदी वार्ड निहाय देखील आढावा घेतला जाईल. जिल्हापरिषद, महापालिका निवडणुकीत आम्हाला चांगलं यश मिळालं आहे. भविष्यात देखील चांगलं यश मिळावं यासाठी आम्ही हा आढावा घेतोय. कार्यकर्ते कशा पद्धतीने कामे करतायेत, पद ज्यांच्याकडे आहे त्यांनी काय केलं हे सगळं आम्ही बघतोय’ अशी माहिती दिली होती. त्यानंतर आज थेट कार्यकारिणी रद्द करण्याचा निर्णय घेण्यात आला आहे.