एकनाथ शिंदे

एकनाथ शिंदे हे महाराष्ट्रातील एक प्रमुख नेते आहेत. कडवट शिवसैनिक म्हणून त्यांची ख्याती आहे. मितभाषी, संयमी राजकारणी म्हणून त्यांची ओळख आहे. साधा रिक्षाचालक ते मुख्यमंत्री हा त्यांचा प्रवास थक्क करणारा आहे. वयाच्या 18 व्या वर्षी शिवसेना प्रमुख बाळासाहेब ठाकरे आणि ठाण्यातील शिवसेनेचे नेते आनंद दिघे यांच्या ते संपर्कात आले. शिवसेनेच्या प्रत्येक आंदोलनात सहभाग घेतला. महाराष्ट्र-कर्नाटक सीमा आंदोलनात त्यांनी पोलिसांचा लाठीमारही खाल्ला. 1997मध्ये त्यांना आनंद दिघेंनी ठाणे महापालिका निवडणुकीचं तिकीट दिलं. या निवडणुकीत शिंदे घवघवीत मतांनी विजयी झाले. त्यानंतर ते ठाणे महापालिकेचे सभागृह नेतेही झाले. सभागृह नेते म्हणून पालिका गाजवल्यानंतर 2004मध्ये त्यांनी विधानसभेची निवडणूक लढवली. पहिल्याच विधानसभा निवडणुकीत ते निवडून आले. 2004 पासून सलग चार वेळा ते कोपरी पाचपाखाडी मतदारसंघातून आमदारपदी निवडून आलेले आहेत. त्यानंतर 2014मध्ये शिवसेना विरोधी पक्षात बसणार होती. तेव्हा 12 दिवसांसाठी ते गटनेते झाले होते. त्यानंतर शिवसेना सत्तेत गेल्यानंतर ते मंत्रीही झाले. शिंदे यांनी या आधी 2015 ते 2019 पर्यंत सार्वजनिक बांधकाम या खात्याचे मंत्री म्हणून काम पाहिले. 2019मध्ये ते कोपरी पाचपाखाडी विधानसभा मतदारसंघातून विजयी झाले. सध्या ते ठाकरे सरकारमध्ये नगरविकास मंत्री झाले. मात्र, ठाकरे सरकारमध्ये असतानाच शिंदे यांनी बंड केलं. शिवसेनेचे 40 आमदार आणि दहा अपक्ष आमदारांना घेऊन त्यांनी भाजपशी हातमिळवणी केली. त्यानंतर भाजप आणि शिंदे गटाने राज्यात सत्तास्थापन केली. एकनाथ शिंदे हे राज्याचे मुख्यमंत्री झाले. त्यानंतर शिंदे गटाने शिवसेना आणि धनुष्यबाण चिन्हावर हक्क सांगितला. निवडणूक आयोगानेही शिंदे गटाला पक्षाचे नाव आणि निवडणूक चिन्ह दिलं. सध्या हे प्रकरण सर्वोच्च न्यायालयात प्रलंबित आहे.