अजित पवारांचं शेवटचं सीसीटीव्ही फुटेज का मिळालं नाही? सुनील तटकरेंनी स्पष्टच सांगितलं

अजित पवार यांचा भीषण विमान अपघात झाला होता, या अपघातामध्ये त्यांचा मृत्यू झाला. अजित पवार यांच्या विमान अपघातावर राष्ट्रवादीच्या अनेक नेत्यांकडून शंका उपस्थित करण्यात येत आहेत. राष्ट्रवादी शरद पवार गटाचे आमदार रोहित पवार यांनी या अपघातावर शंका उपस्थित करत घातपाताचा संशय व्यक्त केला आहे. दरम्यान अजूनही अपघातापूर्वीचं अजित पवार यांचं शेवटचं सीसीटीव्ही फुटेज समोर आलेलं नाहीये, याबाबत आता सुनील तटकरे यांची प्रतिक्रिया समोर आली आहे. त्यांनी आज पंढरपूर येथे जाऊन विठ्ठल रुक्मिणीचं दर्शन घेतलं, त्यानंतर ते पत्रकारांशी बोलत होते.

यावेळी त्यांनी बोलताना म्हटलं की, या प्रकरणात तपास यंत्रणा काय तपास करते? हे काय कोणाला माहिती होण्याचं कारण नाही.  अजित पवार यांच्या अपघाताबद्दल जो प्राथमिक अहवाल आला आहे, त्या अहवालावर आम्ही समाधानी नाहीत. त्यामुळे आता तपास यंत्रणांनी अंतिम अहवाल लवकरात लवकर जाहीर करावा, अशी मागणी देखील त्यांनी यावेळी केली आहे.

दरम्यान यावेळी बोलताना त्यांनी बारामती विधानसभेच्या पोटनिवडणुकीवर देखील प्रतिक्रिया दिली  आहे. बारामती विधानसभा मतदारसंघाची पोटनिवडणूक बिनविरोध करण्यासाठी राष्ट्रवादी काँग्रेस शरदचंद्र पवार पक्षासह इतर पक्षांनी पाठिंबा दिला आहे. काँग्रेसनेही तो पाठिंबा द्यावा अशी आमची भूमिका आहे.  यासाठी गरज पडली तर लोकसभेतील विरोधी पक्षनेते व काँग्रेसचे नेते राहुल गांधी यांची आम्ही भेट घेऊ असं तटकरे यांनी म्हटलं आहे. दरम्यान या निवडणुकीत काँग्रेसने उमेदवार देण्याचं जाहीर केल्यामुळे ही निवडणूक चुरशीची ठरण्याची शक्यता आहे.

पुढे बोलताना तटकरे म्हणाले की,  सध्या आमचे लक्ष बारामती विधानसभा मतदारसंघाच्या पोटनिवडणुकीवरती आहे. त्यामुळे सध्या महाराष्ट्रामध्ये जे काही सुरू आहे, त्यावर मी आत्ताच बोलणार नाही.  मी केवळ विठ्ठल दर्शनासाठी आलो आहे. येत्या चार-पाच दिवसांमध्ये पत्रकार परिषद घेऊन या सगळ्या प्रश्नांना उत्तर देणार आहे, असंही यावेळी तटकरे म्हणाले.  दरम्यान आता पत्रकार परिषदेमध्ये सुनील तटकरे नेमकं काय बोलणार?  हे पहाणं महत्त्वाचं ठरणार आहे.