दिल्ली पोलिसांकडून अभिजीत दीपके किडनॅप? सीजेपीच्या आरोपाने देशात खळबळ

कॉकरोच जनता पार्टीचे अध्यक्ष अभिजीत दीपके यांच्या अडचणीत वाढ झाली आहे. दिल्ली पोलिसांनी दीपके यांना ताब्यात घेतल्यानंतर त्यांच्या विरोधात कारवाई सुरू केली आहे. दीपके यांनी लहरा दो तिरंगा हे आंदोलन छेडलं होतं. त्यावेळी पोलिसांनी त्यांना ताब्यात घेतलं. दिल्ली पोलिसांनी दीपकेंविरोधात कोणते गुन्हे दाखल केले? आता पोलिसांचं पुढचं पाऊल काय असणार आहे? याबाबतची संपूर्ण माहिती समोर आली आहे. तर दिल्ली पोलिसांनी दीपकेंना किडनॅप केल्याचा आरोप सीजेपीने केला आहे. त्यामुळे देशभरात खळबळ उडाली आहे.

एएनआयच्या दाव्यानुसार, अभिजीत दीपके यांच्यावर बीएनएसएसच्या कलम 126/170 अंतर्गत कारवाई सुरू करण्यात आली आहे. शांततेचा भंग किंवा शांतता बिघडण्याची शक्यता म्हणून हे कलम लावण्यात आले आहेत. दिल्ली पोलीस आता दीपकेंना आज एसईएम कोर्टात हजर करणार आहे. विशेष म्हणजे, एक वर्षभर शांतता भंग करणार नाही, या अटीवर कोर्टाने मागच्यावेळी दीपकेंना सोडलं होतं. त्यामुळे आता कोर्ट काय निर्णय देते याकडे सर्वांचं लक्ष लागलं आहे.

.@abhijeet_dipke has been kidnapped by @DelhiPolice

It has been more than 10 hours since he was picked up but until now, neither his parents, nor his lawyers & not the CJP team have been given any updates about his location

We’re all asking only one question: #AbhijeetKahanHai

— Cockroach Janta Party – CJP (@Cockroachisback) October 16, 2026

पोलिसांनी काय म्हटलं?

16 ऑक्टोबरच्या संध्याकाळी AISAची राष्ट्रीय अध्यक्ष नेहा बोरा आणि कार्यकर्ते अभिजीत दीपके यांना संबंधित कलमांतर्गत ताब्यात घेण्यात आलं आहे. दिल्ली पोलीस अधिनियमांच्या कलम 65 अंतर्गत औपचारिक प्रक्रिया पूर्ण केल्यानंतर नेहा बोराला सोडून देण्यात आलं आहे. तर दीपकेंच्या विरोधात BNSS च्या कलम 126/170 अंतर्गत कारवाई सुरू करण्यात आली आहे. त्यांना कोर्टात हजर करण्यात येणार आहे, असं दिल्ली पोलिसांनी सांगितलं.

सीजेपीचा आरोप काय?

यावेळी सीजेपीने दिल्ली पोलिसांवर गंभीर आरोप केला आहे. अभिजीत दीपके हे आंदोलनाच्या ठिकाणी जाण्यापूर्वी घराच्या बाहेर फेरफटका मारत असताना त्यांना ताब्यात घेतलं आहे. दिल्ली पोलिसांनी त्यांना किडनॅप केलं आहे, असं सीजेपीने म्हटलं आहे. दिल्ली पोलीस दीपकेंना अज्ञात स्थळी घेऊन गेली आहे. आमचा त्यांच्याशी संपर्क झालेला नाही. त्यांना वकिलांशी बोलण्याचीही परवानगी दिली जात नसल्याचं सीजेपीने एक्सवर केलेल्या पोस्टमध्ये म्हटलं आहे.