Abhijeet Dipke-Sharad Pawar : शरद पवारांसमोर अभिजीत दीपके महाराष्ट्रातल्या विरोधकांबद्दल काय म्हणाले?

महाराष्ट्रातील दिग्गज नेते शरद पवार यांनी आज दिल्लीत जंतर-मंतरवर जाऊन कॉकरोच जनता पार्टीच्या आंदोलकांची भेट घेतली. यावेळी सीजेपीचे संस्थापक अभिजीत दीपके यांच्याशी शरद पवार यांनी संवाद साधला. शरद पवार हे आंदोलन करणाऱ्या मुलांची स्थिती जाणून घेण्यासाठी तिथे आले होते. अभिजीत दीपके यांनी यावेळी पवारांशी बोलताना त्यांना काय-काय समस्या येत आहेत, त्या बद्दल सांगितलं. अभिजीत दीपके मीडियाशी बोलत होते. त्यावेळी त्यांना पत्रकारांनी महाराष्ट्रातील विरोधी पक्षांकडून सहकार्य मिळालय का? असा प्रश्न विचारला. त्यावर “महाराष्ट्रातील विरोधक पहिल्या दिवसापासून आमच्यासोबत आहेत. शरद पवार असो की उद्धव ठाकरे सर्व सोबत आहेत. शरद पवार यांनी विद्यार्थ्यांबाबत विचारलं. सुप्रिया सुळेंनी फोन केला होता. इथे बॅरिकेड्स आहे. त्यामुळे पवार साहेबांना आम्ही आत घेऊन जाऊ शकत नाही. विद्यार्थ्यांबाबत शरद पवार अत्यंत चिंतीत होते. सर्वच लोक येतील. अनेक लोक येऊन गेले” असं अभिजीत दीपके म्हणाले.

कॉकरोच जनता पार्टीने काल संसदेवर मार्च काढला होता. पोलिसांनी त्यांना रोखण्याचा प्रयत्न केला, त्यावेळी हिंसाचार झाला. पोलिसांनी आंदोलकांवर लाठीचार्ज केला. पोलीस आणि आंदोलकांमध्ये हिंसक झडपा झाल्या. जवळपास 118 पोलीस कर्मचारी जखमी झाले. टीव्हीवरच्या वेगवेगळ्या दृश्यामध्ये पोलीस आंदोलकांना मारहाण करताना दिसत होते. दोन्ही बाजूंनी लोक जखमी झाले.

..तेव्हा एकही विरोधी पक्षाचा नेता दिसला नाही

दरम्यान कालच्या आंदोलनात एकही विरोधी पक्षाचा मोठा नेता दिसला नाही. याआधी सोनम वांगचूक यांचं उपोषण चालू असताना विरोधी पक्षाचे नेते तिथे येऊन भेट देत होते. पण काल संसदेवर मार्च निघाला, त्यावेळी ज्या घटना घडल्या, तेव्हा एकही विरोधी पक्षाचा नेता दिसला नाही. त्यावर आज बरीच चर्चा झाली. विरोधी पक्षांवर सडकून टीका झाली. या सगळ्या घडामोडींच्या पार्श्वभूमीवर शरद पवार आज थेट जंतर-मंतरवरच चर्चेसाठी पोहोचले.  संजय राऊत यांनी गरज पडली तर आम्ही सुद्धा इथे येऊन बसू असं म्हटलं आहे.