सिमेंटलाही असते एक्सपायरी डेट? खरेदी करताना या गोष्टी नक्की तपासा, अन्यथा होईल मोठं नुकसान
जशी खाण्या-पिण्याच्या गोष्टींवर एक्सपायरी डेट असते तशी सिमेंटच्या बॅगेवर असते का? खराब झालेले सिमेंट कसे ओळखायचे? जाणून घ्या सोपी पद्धत.
स्वतःचे घर बांधणे हे अनेकांचे स्वप्न असते. मात्र, घर मजबूत आणि टिकाऊ होण्यासाठी बांधकामात वापरल्या जाणाऱ्या साहित्याची गुणवत्ता तपासणे अत्यंत महत्त्वाचे आहे.
विशेषतः सिमेंट खरेदी करताना त्याची उत्पादन तारीख, साठवणूक आणि गुणवत्ता याकडे लक्ष देणे गरजेचे आहे. निकृष्ट किंवा ओलावा लागलेल्या सिमेंटमुळे बांधकामाच्या मजबुतीवर परिणाम होऊ शकतो.
खाद्यपदार्थांप्रमाणे सिमेंटच्या प्रत्येक पिशवीवर थेट एक्सपायरी डेट असेलच असे नाही. मात्र, त्यावर उत्पादनाची तारीख आणि संबंधित मानकांनुसार आवश्यक माहिती दिलेली असते.
सिमेंट उत्पादनाच्या तारखेपासून तीन महिन्यांच्या आत वापरण्याचा सल्ला दिला जातो. मात्र, याचा अर्थ ९० दिवसांनंतरचे सिमेंट आपोआप निकामी होते असा नाही. त्याची गुणवत्ता योग्य चाचण्यांद्वारे तपासणे आवश्यक आहे.
सिमेंट खरेदी करताना पिशवीवरील उत्पादन तारीख, उत्पादकाची माहिती तपासा. शक्यतो अलीकडे उत्पादित झालेले सिमेंट खरेदी करा. सिमेंटची गुणवत्ता खराब असल्यास काँक्रीटची ताकद आणि बांधकामाची टिकाऊ क्षमता प्रभावित होऊ शकते.
