भारत बनवणार जगातील सर्वात उंच रेल्वे स्टेशन, पर्यटकांना होणार फायदा
Worlds Highest Railway Station : भारतात बिलासपूर-मनाली-लेह रेल्वे मार्ग हा एक महत्त्वाकांक्षी रेल्वे प्रकल्प सुरू आहे. ह मार्ग हिमाचल प्रदेशपासून लडाखपर्यंत डोंगराळ आणि दुर्गम भूभागाला जोडेल. तसेच पुढे चीनच्या सीमेपर्यंत पोहोचेल.
बोगदे आणि पुलांनी भरलेला रेल्वे मार्ग : हा रेल्वे मार्ग डोंगराळ भागातून जाणार असल्यामुळे त्याचा मोठा भाग बोगदे आणि पुलांमधून जाणार आहे. या प्रकल्पांतर्गत 62 बोगदे बांधले जाणार असून त्यांची एकूण लांबी सुमारे 270 किलोमीटर असेल.
116 पूल असणार : संपूर्ण रेल्वे मार्गाचा जवळपास 55 टक्के भाग बोगद्यांतून जाईल. याशिवाय या मार्गावर 116 मोठे पूल ही बांधले जाणार आहेत, ज्यामुळे खोल दऱ्या आणि नद्यांवरून रेल्वे सहज जाऊ शकेल.
एकूण अंतर आणि प्रमुख स्थानके : या रेल्वे मार्गाची एकूण लांबी सुमारे 489 किलोमीटर असेल. संपूर्ण मार्गावर सुमारे 40 रेल्वे स्थानके उभारण्याची योजना आहे. बिलासपूर, सुंदरनगर, मंडी, मनाली, केलांग, दारचा, सरचू, पांग, तेंगला आणि लेह ही प्रमुख स्थानके असणार आहेत.
जगातील सर्वात उंच रेल्वे स्टेशन : या प्रकल्पातील सर्वात खास बाब म्हणजे येथे प्रस्तावित तेंगला रेल्वे स्टेशन हे जगातील सर्वात उंच रेल्वे स्थानक ठरू शकते. हे स्थानक समुद्रसपाटीपासून सुमारे 5359 मीटर उंचीवर उभारण्याची योजना आहे.
15000 फूटांपेक्षा जास्त उंची : संपूर्ण रेल्वे मार्गाची कमाल उंची 15000 फूटांपेक्षा जास्त असेल. त्यामुळे हा प्रकल्प जगातील सर्वाधिक उंचीवर चालणाऱ्या रेल्वे मार्गांपैकी एक ठरेल.
