‘तू सेक्स वर्कर झाली आहेस का?’ मराठी अभिनेत्री झाली साडीवरून ट्रोल, दिलं सडेतोड उत्तर
साडी नेसण्याच्या पद्धतीवरून मराठी अभिनेत्रीला सोशल मीडियावर ट्रोल करण्यात आलं. इतकंच नाही, तर धमक्याही देण्यात आल्या! या संपूर्ण प्रकरणावर अभिनेत्रीनं व्हिडीओ शेअर करत ट्रोलर्सना सडेतोड उत्तर दिलं. नेमकं काय घडलं? जाणून घ्या...
अभिनेत्री आणि मराठी कंटेंट क्रिएटर ऊर्मिला निंबाळकर सध्या तिच्या ‘पुरुषांवर बोलू काही’ या लाइव्ह शोमुळे चर्चेत आहे. या कार्यक्रमाला महिलांकडून चांगला प्रतिसाद मिळत असतानाच, तिच्या साडीवरून सोशल मीडियावर टीका करण्यात आली.
ऊर्मिलानं शोदरम्यान नेसलेल्या गुलाबी साडीतील फोटो आणि व्हिडीओ सोशल मीडियावर शेअर केले होते. मात्र, तिच्या साडी नेसण्याच्या पद्धतीवरून काही नेटकऱ्यांनी तिला ट्रोल केलं. या ट्रोलिंगनं गंभीर स्वरूप घेत तिला सामूहिक बलात्कार, घरगुती हिंसाचार आणि जीवे मारण्याच्या धमक्याही देण्यात आल्या.
या प्रकाराबाबत ऊर्मिलानं व्हिडीओ शेअर करत आपली भूमिका स्पष्ट केली. इन्स्टाग्राम, फेसबुक, युट्यूब आणि खासगी संदेशांमधूनही तिला आक्षेपार्ह प्रतिक्रिया मिळाल्याचं तिनं सांगितलं. वाढत्या ट्रोलिंगमुळे तिला संबंधित पोस्ट आणि रील आर्काइव्ह करावी लागली.
साडी नेसण्याच्या विविध पद्धती या भारतीय परंपरेचा भाग असल्याचं ऊर्मिलानं सांगितलं. भारतात साडी नेसण्याच्या शंभरहून अधिक पद्धती आणि शैली असल्याचा उल्लेख करत तिनं प्रत्येक शैलीमागील इतिहास आणि सांस्कृतिक संदर्भ समजून घेण्याची गरज अधोरेखित केली.
साडी नेसवण्याचं प्रशिक्षण आणि अभिनय क्षेत्रातील अनुभवामुळे ऊर्मिलाला वेगवेगळ्या पद्धतीनं साडी नेसता येते. मात्र, शोसाठी नेसलेली गुलाबी साडी तिच्यासाठीही आव्हानात्मक होती. साडीचा विशिष्ट आकार आणि घेर यामुळे ती नेहमीच्या पद्धतीनं व्यवस्थित नेसणं शक्य नसल्याचंही तिनं स्पष्ट केलं.
साडीवरून ट्रोल करणाऱ्यांना उत्तर देताना ऊर्मिलानं महिलांच्या कपड्यांवरून त्यांचं चारित्र्य ठरवण्याच्या मानसिकतेवर टीका केली. साडीच्या एका बाजूला कंबर दिसली तर संस्कृती जपणारी आणि दुसऱ्या बाजूला दिसली तर चुकीची, असा दुहेरी दृष्टिकोन का, असा सवाल तिनं उपस्थित केला. ‘तू सेक्स वर्कर झाली आहेस का?’ अशा प्रकारची टिप्पणीही एका महिलेनं केल्याचं तिनं सांगितलं. या सगळ्या प्रकारानंतरही शोला मिळणारा प्रतिसाद आणि महिलांचा सहभाग पाहून आपण आनंदी असल्याचं ऊर्मिलानं स्पष्ट केलं.
