Ramayana: आदिनाथ कोठारेच्या सिनेमाचा बॉक्स ऑफिसवर महाविक्रमी धमाका; अवघ्या 6 दिवसांत जगभरात 800 कोटी पार
Ramayana: हा चित्रपट दोन भागांत प्रदर्शित होणार आहे. पहिल्या भागाच्या यशानंतर दुसरा भाग दिवाळी 2028 मध्ये प्रेक्षकांच्या भेटीला येणार आहे. आता पहिल्या भागाची कमाई आणखी कोणते विक्रम मोडते, याची उत्सुकता सिनेरसिकांना लागली आहे.
Ramayana Box Office Collection: अभिनेता रणबीर कपूरचा बहुचर्चित 'रामायण : राइज ऑफ अ लेजेंड' हा चित्रपट बॉक्स ऑफिसवर धुमाकूळ घालत आहे. दिवाळीच्या मुहूर्तावर 5 नोव्हेंबरला प्रदर्शित झालेल्या या चित्रपटाला प्रेक्षकांचा मोठा प्रतिसाद मिळत आहे. प्रदर्शनाच्या पहिल्या दिवसापासूनच चित्रपटाने कमाईचे नवनवे विक्रम करण्यास सुरुवात केली आहे. आता अवघ्या सहा दिवसांत या चित्रपटाने जगभरात 800 कोटींचा टप्पा पार केला आहे.
सहाव्या दिवसअखेर चित्रपटाची जगभरातील एकूण कमाई 823.50 कोटी रुपयांवर पोहोचली आहे. त्यामुळे लवकरच हा चित्रपट 1000 कोटींचा टप्पा गाठणार का, याकडे सर्वांचं लक्ष लागलं आहे. 'सॅकनिल्क'च्या आकडेवारीनुसार, चित्रपटाने प्रदर्शनाच्या सहाव्या दिवशी म्हणजेच 10 नोव्हेंबरला भारतात 94.10 कोटी रुपयांची नेट कमाई केली. यासह भारतातील एकूण नेट कलेक्शन 440.45 कोटी रुपयांवर पोहोचलं आहे.
भारतातील ग्रॉस कमाई 526.50 कोटी रुपये झाली आहे. परदेशातील बाजारपेठेतही चित्रपटाची घोडदौड सुरू असून आतापर्यंत 297 कोटी रुपयांची कमाई झाली आहे. त्यामुळे जगभरातील एकूण ग्रॉस कलेक्शन 823.50 कोटी रुपये झालं आहे. विशेष म्हणजे पाचव्या दिवशी चित्रपटाने भारतात 107.50 कोटींची नेट कमाई केली होती. सहाव्या दिवशी कमाईत सुमारे 12.5 टक्क्यांची घट झाली असली, तरी 94 कोटींचा आकडा चित्रपटाची बॉक्स ऑफिसवरील पकड दाखवणारा आहे.
चित्रपटाच्या विविध भाषांमधील कमाईवर नजर टाकली, तर हिंदी व्हर्जन सर्वाधिक कमाई करत आहे. सहाव्या दिवशी हिंदी भाषेतून 76 कोटी रुपये मिळाले. कन्नड व्हर्जनने 7.75 कोटी, तेलुगूने 4 कोटी, तमिळने 3.60 कोटी, तर मल्याळम व्हर्जनने 2.75 कोटी रुपयांची कमाई केली. देशभरातील 24 हजारांहून अधिक शोमधून ही कमाई झाली आहे. यावरून हिंदीसोबतच दक्षिण भारतातील प्रेक्षकांचाही चित्रपटाला चांगला प्रतिसाद मिळत असल्याचं दिसतं.
केवळ भारतातच नाही, तर परदेशातही 'रामायण'ने आपली छाप पाडली आहे. उत्तर अमेरिकेत चित्रपटाने पहिल्या सोमवारच्या कमाईचा भारतीय चित्रपटांसाठीचा विक्रम नोंदवला आहे. विशेष म्हणजे आंतरराष्ट्रीय बाजारपेठेत अन्य मोठ्या चित्रपटांशी स्पर्धा असूनही 'रामायण'ला प्रेक्षक मिळत आहेत. दिग्दर्शक नितेश तिवारी यांनी या चित्रपटाची निर्मिती भव्य स्तरावर केली आहे. रणबीर कपूरने प्रभू श्रीरामांची भूमिका साकारली असून साई पल्लवी सीतेच्या भूमिकेत आहे.
