किशोर कुमार चुकून ‘जब’ च्या जागी ‘लब’ म्हणाले अन्… लता मंगेशकरांच्या निर्णयामुळे आजही गाजतंय ‘हे’ रोमँटिक गाणं
प्रसिद्ध अभिनेत्री रेखा आणि अभिनेता विनोद मेहरा यांच्यावर चित्रित झालेल्या एका रोमँटिक गाण्याची लोकप्रियता आजही कायम आहे. किशोर कुमार आणि लता मंगेशकर यांच्या सुरेल आवाजातील या गाण्याच्या रेकॉर्डिंगचा एक रंजक किस्सा संगीतप्रेमींना आजही आकर्षित करतो.
1978 मध्ये प्रदर्शित झालेल्या ‘घर’ चित्रपटातील ‘आपकी आंखों में कुछ महके हुए से ख्वाब हैं' हे गाणे आजही संगीतप्रेमींच्या पसंतीस उतरते. रेखा आणि विनोद मेहरा यांच्यावर हे गाणे चित्रित करण्यात आले होते. किशोर कुमार आणि लता मंगेशकर यांनी आपल्या सुरेल आवाजाने त्याला खास बनवले.
या गाण्याचे बोल गुलजार यांनी लिहिले होते. संगीतकार आर. डी. बर्मन यांनी त्याला सुंदर संगीत दिले. प्रेमाची भावना व्यक्त करणारे हे गाणे आजही लोकप्रिय आहे.
गाण्याच्या रेकॉर्डिंगदरम्यान किशोर कुमार यांच्याकडून एक छोटीशी चूक झाली होती. ‘जब हिले’ ऐवजी त्यांनी ‘लब हिले’ असे गायल्याचे सांगितले जाते. मात्र, आर. डी. बर्मन आणि गुलजार यांनी त्यांना मध्येच थांबवले नाही. लता मंगेशकर यांना देखील गाण्याची लिंक तोडायची नव्हती. त्यामुळे गाणं जास्त टेक न घेता रेकोर्ड करण्यात आलं.
लता मंगेशकर यांनी आपला भाग नेहमीप्रमाणे गायला. त्यावेळी त्यांच्या चेहऱ्यावर एक गोड हास्य उमटले. त्यांची ही सहज प्रतिक्रिया आर. डी. बर्मन यांना आवडली.
त्यामुळे रेकॉर्डिंगमधील हा क्षण खास ठरल्याचे सांगितले जाते. जवळपास 5 दशकांनंतरही या गाण्याची मोहिनी कायम आहे. किशोर कुमार आणि लता मंगेशकर यांच्या आवाजातील जादू आजही श्रोत्यांना भावते.
